Shillong, Rymphang 10
Ka Seng Samla Mawlai Pyllun (SSMP) ka kitbok- kitrwiang ïa ki samla pule ka shnong Mawlai kumjuh ïa ki samla ka jylla ki ban ïaleh ïa ka eksamin SSLC, HSSLC 2025 kaba la sdang naduh ka 10/02/2025.
Ka seng ka ai mynsiem ïa ki para samla ba kin minot thop ban ïoh kheit ïa u soh bathiang. Ka Jylla ka angnud ïa ki samla ba kin beh pyndep ïa ki jingpule ba shajrong khnang ba kin lah ban bat hi ïa u lakam pynïaid kam ha baroh ki liang khlem da donkam shuh ban shim wai ne ïarap pyntrei ne pynïaid ïa ki kam bapher-bapher da ki briew kiba nabar jylla.
Sa shisien ka Seng ka kyntu ba kin imsngi thop ban long ka burom ïa ka ïing ka sem, ka shnong ka thaw kumjuh ïa ka jaidbynriew bad ïa ka jylla hi baroh kawei. La pynkut ka kyrwoh khubor na u Publicity Secretary ka SSMP u samla Manbhalang Kharkamni.
