Shillong, Rymphang 10
U Myntri ka Sorkar Jylla ba khmih ïa ka tnad Border Area Development, Rakkam A Sangma u la ïathuh ba ka Sorkar Jylla ka la thoh sha ka Sorkar Pdeng ban kyrpad na ka bynta ban pynbteng biang ïa ka Border Area Development Programme (BADP) hapoh ka Jylla.
Haba kren sha ki lad pathai khubor ha ka Lah Sngi U Blei, u Rakkam u la ong ba ka Border Area Development Programme ka dei kaba treikam la bun-bun snem, hynrei naduh u snem 2021 ïa kane ka prokram la pynsangeh noh da ka Sorkar India.
“Ngi la phah jingthoh sha ka Sorkar India ban kyrpad na ka bynta ba kan pyrkhat biang ïa ka rai, ban bteng biang ïa kane kajuh ka prokram”, u la ong.
Kat kum ka jingong jong u Rakkam, kane ka prokram ka la ïarap shisha ban kyntiew ïa ki kam pynroi hapoh ki jaka khappud, la ka long ha kaba ïadei bad ka jingtei ïa ki ïing skul, ki jaka sumar, ki surok bad ki jingkieng.
U la ong ba mynta ka Inter-State Programme ban shna ïa ki surok, ïing dorbar shnong, ki ïing skul bad kiwei-kiwei ki dang ïai bteng. Haba kylli halor ka jingshah pynsangeh noh ka BADP, u Rakkam u la ong ba um tip satia ïa ka daw ba la pynsangeh noh ïa katei ka prokram.
“Ka dei ka prokram jong ka Sorkar India. Ka dei ka prokram kaba pynlut 90 percent na ka Sorkar Pdeng bad 10 percent na ka Sorkar Jylla. Ngam tip ïa ka daw ba la pynsangeh, lehse ka lah ban dei na ki daw bapher-bapher. Ngi la ai jingthoh biang sha ka Sorkar India ha kaba ngi la kyrpad ba kan pynsdang biang ïa kane ka prokram”, u la ong.
Ha kaba ïadei bad ka bai bam kyrpang sha ki samla pule kiba dei na ki shnong ha khappud, u Rakkam u la ïathuh ba ka bai bam na ka bynta ki samla pule jong ki shnong khappud ka dang ïai bteng beit kumba ka ju long.
