Shillong, Rymphang 10
U President ka Synjuk Nongsynshar Shnong Par Umkhen, Bah Super Rngaid, u la ong ba ka Synjuk kan sa phah da ka jingthoh sha ka ophis ka Meghalaya State Pollution Board bad sha ka Deputy Commissioner jong ka East Khasi Hills ban dawa ba dei ban pyndam beit ïa ka projek shna jaka theh ñiut ha Nonghali kaba hap ha Mawryngkneng C&RD Block.
U la ïathuh ba ka Synjuk kan sa shong jingïalang ha kine ki khyndiat sngi bad kan sa leit ban ai jingthoh shwa ka sngi thep vote jong ka ilekshon MDC.
“Ka jingkwah jong ngi ka long ban kyntu ïa ki bor Sorkar ba ka dei ban pyndam beit ïa katei ka jingthmu ban wanrah ïa ka marten sha Nonghali,” u la ong.
U la ïathuh ba hadien kato ka jingpyrshah ïa ka jingsngap ïa ka sur jong ki paidbah kaba la long ha Nonghali kam shym la don shuh ka jingïakren lada dei bad ki bor Sorkar ne bad ka shnong Nonghali.
U la pynshai ruh ba lada duh ka jaka theh ñiut kam mut ba la duh ïa ki kam pynroi namar ki dang bun ki kam pynroi ba ka Sorkar ka la wanrah bad kaba ka Sorkar ka la pynkhreh ruh.
“Lada ïa pyrshah, ngi dang bun ma ngi namar ngi don haduh 15 tylli ki shnong katba kiba kyrshan ka long tang na shnong Nonghali,” u la ong.
Shuh shuh, u la ong ba ka jingïadie jingïathied bad ka ïoh pisa ne sam pisa ki nongshong shnong Nonghali, ka Synjuk kam tuklar eiei hynrei ka Synjuk ka sngewkhia beit ïa ka jingma ïa ka Wah Umkhen.
U la ong ba ka Synjuk ka la dep jurip ïa katei ka jaka theh ñiut bad kan sa ktah ïa ka wah Umkhen namar kan tuid beit sha kane ka wah. U Bah Super u la pynpaw ba lada ka pateng mynta kam pyrshah ïa kane ka jaka theh ñiut kam myntoi shuh ban pyrshah hadien ynda ka kam ka la ïaid shakhmat namar um kwah shuh ban ïohi kum ha kiwei ki jaka ban pyrshah ynda ka kam ka la ïaid shakhmat.
