Jowai, Rymphang 10
Ka jingïakajia khappud hapdeng ka Assam bad ka Meghalaya na ka bynta ka Block-I ka la thnam syndet na ka daw jong ka ilekshon sha ka ïingdorbar thawaiñ jong ka Jaiñtia Hills Autonomous District Council (JHADC) bad mynta ka kynti ka Karbi Students Association (KSA) ka la pynpaw jingpyrshah ïa ka jinglong kyrtong jong ka Kong Banikas Laban ka ban ïakhun ïa ka ilekshon MDC sha JHADC na ka Congress.
Ka KSA ka la ong ba kam lah ban pdiang da lei-lei ruh halor ka jinglong kyrtong jong ka Kong Banikas namar ba ka dei ka nongshong shnong jong ka West Karbi Anglong District bad kumta kumno ka leit ïakhun ha ka ilekshon JHADC ba la pynlong da ka Jylla Meghalaya.
Ka Kong Banikas kaba dei ka nongshong shnong jong ka shnong Mowluber kaba hap ha Block-I hapoh West Jaiñtia Hills District, katba ka KSA ka kam ba ka shnong Mowluber ka hap hapoh West Karbi Anglong District namar katkum ka jingkam jong ki, u pud u sam jong ka West Karbi Anglong District ka kut haduh ha Wah Myntang.
Kum ban shu pynkynmaw ha ka 6 tarik mynta u bnai, ki nongshong shnong Karbi ki la khang lad khang lynti ïa ka Kong Banikas Laban bad ka kynhun jong ka ha ka por ba ka poi ha ka shnong Umkhyrmi bad ki Karbi ki kylli balei ki leit ïalap ilekshon na ka shnong jong ki kaba hap hapoh West Karbi Anglong District, Assam.
Ki la ong ruh ïa ka Kong Laban ba ka dei ban shim jingbit shwa na ki bor pynïaid jong ka West Karbi Anglong District shwa ba kan ïaid lynti na ka shnong jong ki.
