Shillong, Rymphang 10
Ka jingshah tuh jong ki arshaka ka dang ïai bteng na kawei ka por sha kawei pat. Kane ka la pynlong ïa ki trai ban ym shngaiñ shuh haba buh ne pynïeng ha kino-kino ki jaka wat ha phyllaw ïing lade ruh.
Katkum ka khubor kaba la ïoh na ki pulit la ong ba ha ka 8 tarik mynta u bnai, u Sukhdev Singh na ka thaiñ Goraline, Laitumkhrah, Shillong u la pyntip sha ki pulit jong ka thanat Laitumkhrah ba ki runar bym lah ban ithuh ki la tuh ïa ka arshaka jong u, kaba don ïa u registration number ML05-T-5720.
Ha kawei pat ka khubor la ong ba u Bhim Ghatani u la ai ka jingujor sha ki pulit ba ha ka step jong ka 8 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-Z-3320 na ka shnong Dongkamon, Nongmensong ha nongbah Shillong.
Ha kaba ïadei bad kane ka jingjia shah tuh jong ki arshaka, na ka liang jong ki pulit mynta ki dang pynlong ka jingtohkit bad ban thwet ïa ki runar kiba donkti ha kane ka kam.
