Shillong, Rymphang 11
U Superintendent of Police (SP) ka East Khasi Hills District, Bah Vivek Syiem, u la ong ba ha kane ka sien kaba mynta la sakhi ba ka ilekshon MDC sha ka Khasi Hills Autonomous District Council (KHADC) ka long ka ilekshon kaba jai-jai bad kaba ym don satia kino-kino ki kynrum-kynram.
Kum ban shu kdew hangne ba ha ka ilekshon MLA ha u snem 2023 bad ha ka ilekshon MP sha ka ïingdorbar thawaiñ ka Lok Sabha ha u snem 2024, ki la mih shibun ki huri-hura ha ki konstitwensi bapher-bapher hapdeng ki nongkyrshan jong ki kyrtong.
Ha ka jingïoh ïakren bad U Nongsaiñ Hima ha ka 11 tarik Rymphang, 2025, u Bah Vivek u la ong, ba ha kylleng ki jaka ïalap ilekshon ba la pynlong da ki kyrtong shimet ne ki kyrtong jong ki seng saiñpyrthei bapher-bapher ruh ne ha ki rynsan ïathir ba la pynlong khnang na ka bynta ban sngap ïa kaei kaba ki kyrtong ki don ban pynpaw ruh, kim don satia kino-kino ki jingmih huri-hura ne ki kynrum-kynram ki ban jia ha ki konstitwensi bapher-bapher.
“Kane ka dei kawei na ki ilekshon kaba jai-jai bha bad kaba ym don satia kino-kino ka jingmih ki kynrum-kynram ban ïa kaba ïanujor ha kiwei pat ki ilekshon. Ngi sngewtynnad ban ïohi ba ka shongsuk-shongsaiñ ka don bad ba ki paidbah ki la sngewthuh kham shai ïa kaba jingmut bashisha jong ka ilekshon”, ong u Bah Vivek.
