Nongpoh, Rymphang 11
Ha kawei ka jingjia ha ka Sngi Ba-ar, uwei u nongsam dud u la duh noh ïa la ka jingim hadien ka jingshah tynrah ha ka kali kaba synran ïa ki heh shipai jong ka Assam Rifles ha ka surokbah National Highway 6 marjan bad ka ophis u Deputy Commissioner ka Ri Bhoi District.
Katkum ka tyllong khubor na ki pulit, la ïathuh ba katei ka jingjia, ka la jia ha ka por kumba 10:20 baje mynstep katba katei ka kynhun jong ki shipai ka dang hiar sha nongbah Guwahati, ha kaba la ïathuh ba utei u nongsam dud, ïa uba la tip kyrteng kum u Jonga Bahadur Sunar, 69 snem ka rta na ka shnong Shangbangla u la jam kynsan sha shiliang ka surokbah da ka bicycle kaba u pyndonkam ban leit sam dud bad shah tynrah noh ha ka kali kaba lai kaba synran ïa ki heh shipai kaba don ïa u registration number ML05-Y-3232 kat haduh ba kan leit tynrah ruh ïa u divider jong ka surok bah bad bthei syndon ka shaka khmat.
La ïathuh ruh ba ïa u Jonga Bahadur Sunar uba la mynsaw jur ha katei ka jingjia, la pynkit noh sha Civil Hospital Nongpoh na ka bynta ban pynïoh ïa ka jingsumar kaba kyrkieh. Hynrei, namar ka jingjur jong ka jingmynsaw la pynkit noh sha North Eastern Indira Gandhi Regional Institute of Medical Sciences (NEIGRIHMS) bad khlad noh shisyndon hapoh katei ka jaka sumar.
Na ka liang ki bor pulit ka thanat Nongpoh ki la rah noh ïa katei ka kali kaba tynrah ïa u nongsam dud sha thanat na ka bynta ban pynlong shuh ïa ka jingtohkit bad ruh ban pyndep ïa ki bynta katkum ka aiñ.
