Shillong, Rymphang 11
Ka Organising Committee jong ka Khasi Students’ Union – Mawkhar Circle (KSU) ha ka Sngi Ba-ar ka la ïoh ban pynher krad noh ïa katto-katne ngut ki bar-jylla kiba wan trei be-aiñ khlem kino-kino ki kot k- sla kiba biang.
Kine ki bar-jylla ki dei kiba trei ha Umsohsun.
“Hynrei katba kine ki bar-jylla kiba wan trei bad sah ruh ha katei ka jaka ki dang song ïa ki tum ki tam ban leit noh, la wan mih pynban da ki pulit ban khang lad ïa ki dkhot jong ka seng,” ong ka kyrwoh na ka seng.
Ka kyrwoh ka ong ba ha katei ka por, ka la don ruh ka jingïa-pyn-i-nia ïa ki pulit ba shaei ki jah ha kine ki taïew ba la dep ba shah pynthut ka ïaid ka ïeng jong ki paradoh-parasnam ha kine kijuh ki bar-jylla kiba sah bad trei ha katei ka jaka.
“Ka KSU-Mawkhar Circle ka la buh jingkylli ruh ba balei ki pulit ki long pyrshah pynban ïa ka jingshong shngaiñ ka shnong ka thaw,” ong ka kyrwoh.
Ka seng ka la ong ruh ba ha kine khyndiat taïew ba la leit, ki ‘riew paidbah ki la pyntip (sha ka seng) ba kine kijuh hi ki bar jylla kiba trei ba sah ha katei ka jaka da lah miet ki ïadih ïabam bad ynda ki lah buaid, ki pynthut ruh wat ïa ka ïaid ka ïeng ki briew kiba ïaid na katei ka jaka.
“Kaba lyngngoh mynta ka long, shaei ki jah kita ki pulit ba don ka jingkitkhlieh ha kata ka por?” buh jingkylli ka seng.
“Ka kyrwoh kaba shai sha kino-kino kiba pyrshang ban khang lad ïa ka seng ban kyndang ïa kine kiba buhai shnong, ka seng kan ym sngap ïano-ïano ruh bad kan ïaid beit shakhmat khnang ba ka Ri bad ka Jaidbynriew kan shongsuk,” ong ka kyrwoh.
