Shillong, Rymphang 11
U President ka National People’s Party (NPP) Meghalaya Unit, Bah Prestone Tynsong uba dei ruh u Symbud Myntri Rangbah ka Jylla, u la ong ba u ïohi ïa ka jingïashrut bad ïadait para MLA ha ka seng thymmai kaba dang shu mih namar ka kam ïa pynduh tiket MDC hynrei ha ka NPP haduh mynta kam ju don ka jingïaknieh shuki.
Ïa kine ki kyntien u Bah Prestone u la pynpaw haba ai jingkren haba ïalap ilekshon ha shnong Umthli ha kane ka taïew na bynta u kyrtong ka NPP na Lyngkyrdem-Laitkroh Konstitwensi u Bah Rahboklang Tynsong.
U Bah Prestone u la ong biang ba ki don ki seng thymmai haba ki la dep ai tiket hadien shi taïew ki weng noh ban ai da uwei pat, hynrei ka NPP haba ka ai tiket ka dei ka jingïarai lang bad ki shnat (unit) kiba dei na ki shnong.
U la ong ba ha kine ki sngi, ki nongïalap ilekshon khamtam ha ka seng thymmai ka thong jong ki, ka long ban shu kawang beit ïa ka NPP, ki kawang beit ïa u Conrad, Prestone bad ïa u Bah Gavin khlem sngewthuh sngewthaw shuh da kaba ki kynnoh nongtuh.
“Tang kawei, kine ki seng thymmai ki bakla namar ki khlem kynnoh ba kumno u Conrad bad Prestone ki leit tuh pisa nangno ban pynphyrnai ïa ka Meghalaya,” u la ong biang.
Shuh shuh, u la pyntip ba naduh ba synshar ka NPP ïa ka Meghalaya, ym duna haduh 38 hajar klur ka la wanrah ïa ki kam pynroi ha kylleng ka jylla lyngba ki tnat Sorkar bapher-bapher.
U Bah Prestone u la pyntip ba naduh u snem 2003 haduh 2017 u don ha ka Congress hynrei naduh ba u rung sha ka NPP haduh mynta kam ju don ka jingïashrut ne ïaknieh shuki hynrei ki shu ïarkhie beit kum shipara.
