Shillong, Rymphang 11
Ka Khasi Students’ Union (KSU) West Jaiñtia Hills District Unit ha ka 11.02.2025 ka la ïakynduh ïa u Deputy Commissioner (DC) jong ka West Jaiñtia Hills District ban ïakren halor ka jingshah byrngem jong ki para-doh para-snam ha ki briew ba la tip kum ka Karbi Students Association (KSA).
La ong ba na ka liang ka KSU ka la byrngem ba kim dei ban ïashim bynta ha kane ka ilekshon MDC sha ka JHADC namar ba kine ki shnong hapoh Block-1 ki hap shapoh ka Jylla Assam. Ka KSU West Jaiñtia Hills District Unit ka la pynrem jur ïa kane ka jingbyrngem jong kane ka seng napoh Karbi.
Ha ka jingïakren, la ong ba na ka liang jong u DC u la kular ban shimkhia bad ban ym ailad da lei-lei ruh ba kan mih kano-kano ka jingkulmar bad ai ïa ka jingïada khnang ba ki para-doh para-snam kin ïoh ban pyndep ïa la ka jong ka hok.
Ka KSU ka kyntu ruh ïa ki paidbah ba kim dei ban tieng ki dei ban mih shakhmat bad ban ïalong tylli bad ban pyndep ïa la ka jong ka kamram bad ka seng ruh kan ïai don ryngkat kumba ka ju don la ka long ha kano-kano ka bynta. La pynkut ka kyrwoh na u samla Leningrad Tariang, GS ka KSU West Jaiñtia Hills District Unit.
