Shillong, Rymphang 12
U President ka MSSASA, Sengkmie, Bah Aristotle C. Rymbai ha ka Sngi Balang u la leit ban ujor da ka ejahar halor ka jingkynnoh shna ‘Account’ thok ha ka rynsan lad pathai ‘Facebook’ ha ka kyrteng jong u.
U la ong ba ïa kane ka ‘Account’ la shna da u briew u bym ithuh satia, khlem ka jingbit jong u ne jong ka seng, bad la pyndonkam ïa ka na ka bynta ki jingthmu ba sniew.
“U briew uba don bynta ban shna ïa kane ka ‘Account’ thok ym tang ba u la pyndonkam ïa ka kyrteng jong nga, hynrei ïa ka seng kaba nga ïadon bynta,” ong u Bah Rymbai ha ka ejahar ba la ujor ha thanat Sadar.
U la ong ruh ba ïa kata ka ‘Account’ ba la pynmih ha ka 11 tarik Rymphang, 2025 ryngkat katto-katne ki jingthoh ki bym don nongrim, na ka liang jong u, u kyntait ïa ka jingthoh bad ki jingpynmih ha katei ka ‘Account’ bad um don jingtip eiei halor kane ka bynta.
“Ïa kane ka jingleh la leh da ka jingthmu ban pynsniew ïa ka burom jong nga, ïa ka seng bad ban pyndik ïa nga. Nga pynpaw shuh-shuh ba ngam shym la ai bor ïano-ïano ruh ban shna ‘Facebook Account’ ha ka kyrteng jong nga bad ka kyrteng jong ka seng, bad ngam shym la ai ruh ïa kino-kino ki jingtip shimet sha kum kine ki briew,” u la ong.
Na ka liang u President u la kyrpad ïa ka tnad pulit ban tohkit halor kane bad ban pynshitom pyrshah ïa u (ki briew) ba donkti ban thaw ïa kane ka ‘Account’ thok, namar kane ka buh jingma khamtam ïa u bad ka seng baroh kawei.
Ha kawei pat ka liang, haba ïadei bad ka tulop jong ki nonghikai SSA hapoh ka Jylla, u Bah Rymbai u la pynshai ba katkum ka jingïakren jong ka seng bad ki ophisar ka tnad pule-puthi ka Sorkar Jylla ha u taïew ba la dep, ki la pyntip ba ka Sorkar India ka la phah ïa ka hukum jingmang na bynta ban pyllait ïa ka sien siew kaba 3 jong ka ‘SSA Grant’.
“Mynta ki dang ap ban phah ïa ka pisa sha ka ‘Single Nodal Agency Account’, kaba dei ka ‘Account’ jong ka Sorkar Jylla ha kaba ka skhim ba ka kyrshan da ka Sorkar Pdeng, ka ‘Grant’ ba ïohpdiang na ka Sorkar Pdeng ban phah sha ‘Account’. Shisien ba la phah ïa ka pisa sha kane ka ‘Account’, kata kin sa phah pat sha ki ‘Account’ jong ki nonghikai SSA,” u la ong.
Shuh shuh u la bynrap ba ki ophisar ka tnad pule-puthi ki la pyntip ruh sha ka seng ba kane kan sa urlong ha kine ki khyndiat sngi ban wan.
