Shillong, Rymphang 12
Ka Sorkar Jylla lyngba ka tnat Pla Tyngka ha ka Sngi Balang ka la pynlong ïa ka jingïasyllok paidbah halor ka Mang Tyngka jong u snem 2025-26 ka ban sa wanrah hapoh ka Ïingdorbar Thaw Aiñ. Ïa kane ka jingïasyllok paidbah (Pre-Budget Consultation) la pynïaid da u Myntri Rangbah ka Jylla, Conrad K Sangma.
Kane ka jingïasyllok kaba la neh haduh lai kynta ka long ban ïoh ïa ki rukom pyrkhat thymmai ka long ka lad ïa u Myntri Rangbah ban pynpaw bad batai ïa baroh kiba don bynta lang kiba la poi ha ka jingïalang bad kiba shim bynta lyngba ka ‘internet’. Kiba la ïashim bynta ki kynthup ïa kiba wan na ka pule puthi, ka rep ka riang, nonghikai, ki stad ka ïoh ka kot, ki kynhun treimon sngewbha bad kumjuh na ki nongthoh khubor.
Ha ka jingkren sdang jong u Myntri Rangbah, u la pynpaw ba ka jingthmu jong kane ka jingïasyllok ka long ban pan jingmut na baroh kiba don bynta lang ban pynthikna ba ka Mang Tyngka kan kynthup ïa ka jingangnud jong ki paidbah nongshong shnong ka Meghalaya.
Haba pynpaw ïa ka thong na ka bynta ka ïoh ka kot ha ka Jylla, u Conrad u la jubab ruh ïa ki jingai jingmut bad ki jingwad jingtip jong ki nongïashim bynta na ki liang bapher-bapher. U Myntri Rangbah u la ai jingmut ruh ba ki nongshong shnong kin phah ïa ki jingpan jingshai lyngba ka lad ïarap lane ka ‘CM Connect helpline’.
U la ong ba ka Sorkar ka skhem jingmut ban pynthikna ba yn kynthup lang ïa baroh ha ka jingkiew ka ïoh ka kot hapoh ka Jylla, bad ban thaw kam ruh na ka bynta ki nongshong shnong.
U Myntri Rangbah u la ong ruh ba ka rynsan OTT ‘Hello Meghalaya’ ba dei trai da ka Sorkar Jylla, ka la plie lad na ka bynta ki ‘riew donsap kum ki ‘content creators’ bad nongshna phlim ba kin ïoh ïa ka bainong na ka bynta ka kam ba ki trei.
U Conrad u la pynpaw ruh ba ka jinglah jong ka Jylla Meghalaya ban bteng ka jingbei pisa na ka bynta ban tei ïa ki jingdonkam ha ki kam ïalehkai ha ki snem ba la dep, ka la shah jied ban pynlong ïa ka National Games ha u snem 2027.
Lah ban kdew hangne ba u Myntri Rangbah, Conrad K Sangma un wanrah ïa ka Mang Tyngka jong ka Jylla ha ka 5 tarik Lber 2025 ha ka dorbar mang tyngka ka ban sdang naduh ka 28 tarik Rymphang.
