Jowai, Rymphang 12
Ka 1-Nartiang Konstitwensi ka don ha ka kyrdan ‘Top List’ ha ka liang ka roi ka par bad kane ka urlong ym dei da ka jingstad ne jinglah jong u MLA hynrei lyngba ka jingstad jong ki paidbah ban jied ïa u nongmihkhmat.
Ïa kane la ong u National General Secre-tary ka NPP u Bah Sniawbhalang Dhar uba long ruh Symbud Myntri Rangbah ka Jylla ha ka jingïalang ïalap ilekshon na ka bynta u kyrtong ka NPP na Moodop-Umladang Konstitwensi Ma Thombor Shiwat uba dei u CEM jong ka JHADC ha shnong Bambthong ha ka 11 tarik Rymphang.
Haba kynthoh ïa ka jingïalap ka VPP ban jied ïa ka (VPP) ban wanrah ka jingkylla, u Ma Sniawbhalang u la ong, “Hapoh 1-Nartiang Konstitwensi ha shwa phin kren phin hap ban pyrkhat bad ka VPP, hato ka VPP ka dang lah ban pynkylla ïa kaba nga la dep leh? Bad bynrap kaba kumno pat ka jingkylla kaba ka VPP ka kwah ban pynkylla.”
U la ong ruh, “Ki nongkyrshan ka VPP ki dei ban kynmaw ba marsien rung na shnong Mynsngat kin ïaid lyngba ïa ka surok bad pynlong jingïalang ha ki hall kiba nga shna bad dei tang ka ‘Mic’ hi kaba ki hap ban rah nalade.”
Haba pan ka jingkyrshan ïa u Ma Thombor, u Ma Sniawbhalang u la ong, ha kino-kino ki bynta donkam ban ïoh da ki briew kiba shemphang ne ‘experience’ ban ïaid beit ïaid ryntih ka kam ka jam, kumjuh ruh ha ka ilekshon MLA/MDC donkam ban jied da ki briew kiba la shemphang bha ha ka kam, khnang ba ka 5 snem kan ym kut tang ha ka jingwad jingkhang ha Secretariat bad District Council, da kaba pynskan ba u Ma Thombor um dei u nongwad jingkhang hynrei u nongrah kam pynroi ïa ki paidbah.
U Ma Sniawbhalang u la ong ba u Ma Thombor Shiwat u la jop la laisien ïa ka ilekshon MDC bad u pynpaw ruh ka jingsngew skhem ba ki paidbah kin pynjop biang ïa u ha kane ka kynti khnang ba un pyndep ïa kiba bun ki kam pynroi hapoh ka konstitwensi.
Haba kyntu ïa ki paidbah ban shimkhia ha ka kam jied nongmihkhmat, u Ma Sniawbhalang u la ong, ka ilekshon kam dei ban shong kali motor, bam dih kyrhai hynrei ban jied ïa u syiem ban synshar bad ïada ïa ka jaidbynriew.
