Shillong, Rymphang 12
U Vice President ka United Democratic Party (UDP), Bah Robertjune Kharjahrin u la ong ba ka jingai jait katto-katne ngut ki rangbah Khasi shalade ïa ki khun, kam dei kaei-kaei hynrei ka dei ka sarong shynrang.
Haba kren halor ka jingpynsngew jong katto-katne ngut ki briew ban ai jait noh sha u shynrang ïa ki khun, u Bah Robert u la ong ba ka riti dustur jong ki Khasi ka dei kaba ai jait sha ka kmie.
“Ine iwei i jingïaleh stad jong katto-katne ngut ki briew hapoh ka jaidbynriew jong ngi, ka lah ban long pynban u dieng kyndok uba lah ban thang ïa baroh kawei ka ïing jong ngi. Kane ka dei kaei-kaei kaba mynsaw ha ka jingïohi jong nga”, u la ong.
U Nongïalam ka UDP u la ong ruh ba ha kylleng sawdong ka pyrthei mynta ka wad ïa ki lad kumno ban pynkup bor ha ki kynthei, hynrei ha kane ka Jylla kam ju don kum kata namar ki longkmie ki la shah pynkup bor lypa da ka riti ka dustur, ki long ki trai jong ka ïing ki trai jong ka kur.
“Haduh katno ka poh kata ka jaidbynriew jong ngi bad ka riti jong ka jaidbynriew jong ngi? Haduh ba ngim lah shuh ban bud ïa ki. Kane ka jingai jait jong ki katto-katne ngut ki rangbah Khasi shalade ïa ki khun kam dei kaei-kaei, ka dei tang ka jingsarong shynrang, kaba sngew ba tang namar ba ki long ki shynrang kin ñiew beiñ noh ïa ki longkmie”, la ong u Bah Robert Kharjahrin.
U la ong ba ym dei ban pynbakla bad ka district council ka don na ka bynta ban pynneh pynsah ïa ki riti dustur ym ban bujli lane pynkylla ïa ki.
U la ong ruh ba ym dei tang kata kaba ai jait sha ka kmie, lada peit ïa ki dorbar trai ri bapher-bapher naduh ki dorbar Hima ki dorbar Raid la seng da ki kur.
Haba ai nuksa ïa ka Hima Mylliem, u la ong ba dei tang kawei ka Kur kaba lah ban long Syiem, ki Kur kiba lah ban long Syiem Raid, long Myntri, Basan bad ki Bakhraw.
“Ki kur ki don ïa kata ka bynta kaba khraw ha ka synshar-khadar trai ri, namar khlem ki kur phin ym lah ban jied Syiem, khlem ki kur phin ym lah ban don ki Myntri, ki Lyngdoh, ki Bakhraw namar dei kine ki kur kiba wanrah ïa ka thymmei ha ka synshar-khadar trai ri ha ka jaidbynriew ka jong ngi”, u la ong.
U Bah Robert u la ong ruh ba lada pynbakla noh ïa ka ai jait ka mut la pynbakla noh ïa ka kheiñ kur, bad lada bakla ka kheiñ kur ka bakla noh ka synshar trai ri.
“Lada u Syiem jong ka Hima u sdang ban ai jait noh shalade ïa ki khun, hadien habud kan sa don ka jingïaknieh Syiem hapdeng ki khun jong u bad ki khun pyrsa jong u, kan mih ka huri-hura, wei ba la mih ka huri-hura ka mut ym lah shuh ban jied Syiem, ban jied Myntri ban jied Lyngdoh bad lada ym lah shuh ban jied ka mut ka la hap”, la ong shuh shuh u Bah Robert.
