Da u MM Thaiang
Jowai, Rymphang 11
Ha ki phew snem ba la leit noh la don ki khun samla shynrang na ka shnong Byndihati kiba la pyrshang ban jubab ïa ka jingkhot U Blei sha ka jinglong Lyngdoh niam pynban U Blei Um pat ibit ibiang. Ïa kane ka jingkhot ban long Lyngdohniam (Lyngdoh Sohblei) la don u Deacon Resto Shylla u long uba la kloi ïa kane ka jingkhot bad la pynkyntang Lyngdoh Sohblei ïa u ha ka 09/02/2025 ha shnong Byndihati kaba hap hapoh ka Parish Khliehriat da u Lyngdohsad ka Jylla niam Jowai (Jowai Diocese) Most. Rev Ferdinand Dkhar.
Ha kane ka jingpynkyntang Lyngdoh Sohblei (Lyngdohniam) ïa u Deacon Resto Shylla da ki phew hajar ngut ki paid riewngeit na ka Bri U Hynñiewtrep bad nabar ki la ïawan sha Byndihati ban sakhi ïa kane ka jingkhot U Blei ïa u Deacon Resto Shylla ha ka ban shakri ïa U Blei bad ïa la ki parabriew.
Ha ka por 10 baje mynstep ka Mass Jingkñia Iukharist bad ka jingpynkyntang Lyngdoh Sohblei ïa u Deacon Resto Shylla da u Most Rev. Ferdinand Dkhar ha ryngkat ka jingïasynran lang jong 56 ngut ki Lyngdoh Sohblei kiba na ka Jowai Diocese, Nongstoiñ, Archdiocese Shillong bad katto-katne ngut ki Lyngdoh Sohblei na ka Jylla Kerala (South India) kiba la ïawan ban sakhilang ïa kane ka jingpynkyntang Lyngdohniam ïa u Deacon Resto Shylla uba dei na ka kynhun jingïasyllok jong u Francis Assisi, ïa kiba la kham ïatip mynta kum ki OFM, Cap. Ka jinglehniam ha kane ka sngi ka long kaba iphuh-iphieng, kaba shongkun shongblei, naba katba u Lyngdohsad, ki Lyngdoh Sohblei bad u Deacon Resto Shylla ki dang kiew sha Duwan jingkñia ban pyndep ïa ka jinglehniam la pdiang sngewbha ïa ki da ki jingrwai bad ka jingshad tynrai da ki khun Samla Khyllood jong ka Balang shnong Byndihati.
U Bishop Ferdinand u kongsan ha baroh ki jinglehniam, ha ka sneng ka kraw ïa ki paid riewngeit, u la ong ba hapoh ka Balang, u Blei u don la ka jong ka saiñdur ban long ki longkmie longkpa, ki Nongïathuh lypa, ki Nongsynshar, ki Nonghikai, ki Doktor, ki Syiem, kiwei de ki jingkhot bad ban long ki Lyngdohniam bad ha kine ki jingkhot bapher bapher ngin pyndep hok da ka jingriew blei na ka bynta ka burom ka jong u Blei bad ka jingkiew irat jong ki paid bynriew ha ka bha ka miat jong ka longbriew-manbriew.
Ha ka sneng ka kraw ïa u Lyngdoh Sohblei thymmai (Resto Shylla), u Bishop Ferdinand u la ong ka jingkhot ïa phi sha ka jinglong Lyngdohniam ka long ka jingkhot ban shakri ïa u Blei bad ïa ki paid ki jong u Blei ym ban shah shakri bad u da sot artat na ki kyntien jong ka jingthoh bakhuid (Mat.20:28) kaba ong “U khun u briew Um shym la wan ba yn dup shakri ïa u, hynrei u la wan ban shakri”. Haba kren shuh shuh shaphang ki Lyngdoh, u Bishop Ferdinand u ong, “Ïa ki Lyngdohniam Katholik la jied napdeng ki briew, la thung ban long ki Nongmihkhmat ki briew hakhmat u Blei ban tyrwa ïa ki jingai bad ka jingkñia na ka bynta ki lait ki let lajong, jong u paidbah bad jong u khun bynriew.
Nangta, u Bishop Ferdinand u la ong ki Lyngdoh ki dei ki Nongïatreilang kiba bit dor jong u Lyngdohsad haba sumar bad ba ïa ka kynhun langbrot jong u Blei, ki long ki Nonghikai, ki Nongpynphriang ïa ka ktien ka jong u Blei da kaba ïalap ïa ka khubor ba bha katkum ka jinghikai bad ka jingleh jingkam jong u Jisu Khrist, ka jingkñia Iukharist, ka Sakrament jingpynïasuk katkum ka jinghikai pateng jong ka Balang bad ban duwai ban ïoh ka jingisynei u Blei na ka bynta u babun u balang ïa kaba u Blei u la pynkhamti ha ki pynkut ka jingkren sneng kren kraw jong u Bishop Ferdinand.
Ha ka nohphai sngi jong kane ka sngi la don ka jingïaid proseshon kaba lyngkot ha ka shnong Myndihati, la pynkut da ka jingkyrkhu bakyrpang da u Lyngdohsad bad u Lyngdoh Sohblei bathymmai bad ka jingleh burom ïa u Lyngdoh Sohblei thymmai.
