Jowai, Rymphang 12
U kyrtong shimet ban ïakhun ïa ka ilekshon MDC na Jowai South Konstitwensi sha Jaiñtia Hills Autonomous District Council (JHADC) Ma Moonlight Pariat ha ka miet 12 tarik Rymphang u la pynlong ka jingïalang paidbah ha Iungwalieh ka Panaliar Jowai.
Kane ka dei ka sien kaba 12 ban ïakhun ïa ka ilekshon kynthup ka MDC bad MLA bad ka daw ka dei ba ka ri bad ka jaidbynriew ka don ha ka jingma bad donkam ïa ki briew hapoh ka District Council ban ïada ïa ka jaidbynriew, ka hok ki paidbah khamtam ka riti dustur,” la ong u Ma Moonlight.
Ka JHADC mynta ka la khyllem, ong u Ma Moonlight da kaba pynkynmaw ba ha u 2019 u la ong ïa ki paidbah ban jied ïa ki briew kiba lah ban trei na ka bynta ka council hynrei hadien hynriew snem la sakhi ba ka JHADC ka la hap bad khyllem bad ki MDC ha ki hynriew snem kiba la leit noh ki ïohthiah.
U la ong ruh ba ka Para 12 (A) ka dei u mawjynthut kaba teh bad khum ïa ka District Council kumjuh ki MDC ban leit pan ïa ki skhim jingïarap na Delhi.
U la maham ruh ïa ki heh spah ka ri kiba thmu ban pynduh ïa ka Sixth Schedule bad baroh ki phai khmat sha ka thaiñ shatei lam-mihngi namar ka dei ka thaiñ kaba riewspah khamtam ha ki marpoh khyndew bad da kaba pynduh pyndam ïa ka, ki lah ban trei ban ktah katba ki mon.
U Ma Moonlight u la kyntu ïa ki paidbah ban long kiba husiar shwa ban jied ïa ki nongmihkhmat namar ha ki 5-6 snem kiba la leit la ïohi ïa ka jinglong jingman jong ka JHADC.
Nalorkata, u la ong ruh ka Sorkar ha ka jingïalam ka NPP bad UDP ha u Nohprah 2024 ka la wanrah ïa ka aiñ ban pynsuk ïa ki aiñ jaka puta ha kaba ki heh spah na bar jylla ki lah ban thied jaka katba ki mon bad ïoh myntoi pat ki riewshimet ba don ha ka Sorkar.
Shuh shuh, u la ïaroh ruh ïa ki nongtrei jong ka JHADC wat hapdeng ka jingshah pynduh tulop hynrei ki leit trei bad ka jingduh tulop ka dei na ka daw bym shemphang ka Executive Committee.
U la kren ruh halor ka Land Holding bad Pata kaba shimpor slem da kaba kdew ba ki surveyor haba ki leit sorjamin jaka ki hap ban siew hi ïa ka bai lynti namar bym don pisa ka JHADC.
U Ma Moonlight u la ong ruh haba synshar da ki briew kiba nabar Jowai, khyndiat pa khyndiat la nangrit la kum u monbati da kaba ai nuksa ïa ka Jowai Central ka Constituency kaba la shah pynduh pyndam.
Nalorkata u la ïathuh ruh ba kawei na ka thong kaba hakhmat ka long ban ïoh ïa ka Direct Funding ne ka pisa na Delhi lyngba ka Sorkar Pdeng sha ka District Council bad na ka council pat kan leit sha ki Local council da kaba tyngkhap ïa kane ka kyndon ha ka Sixth Schedule ka riti synshar ka ri. U la kyrpad ïa ki paidbah ban kyrshan ïa u ha kane ka kynti sa shisien da kaba shon ha ka muhor jong u Mawlynnai khnang ba un lah ban pyndep ïa ki jingthrang jingangnud jong u.
