Shillong, Rymphang 12
U MDC uba la mih biang ban ïakhun ïa ka ilekshon na Nongkrem konstitwensi kum kyrtong shimet, Bah Lambor Malngiang u la ong ba ka jingïakhun ha kane ka ilekshon ka long para radbah bad ka jingïakhun ha kane ka ilekshon ka dei ka ‘final’ da ka ‘red card’ pat un ai ha u 2028 pyrshah ïa u kyrtong ba pynïeng u MLA.
“Kumba la pynsngew mano-re-mano ba ki ong ba kane ka ilekshon ka dei ka ‘semi final’, hynrei nga kwah ban ong, kane ka dei ka ‘final’ ka ‘red card’ ngin ai ha u 2028 ym dei ba kren kai, ngi ïakren beit ïa ka nong-rim”, la ong u Bah Lam-bor ha ka jingïalang ïalap ilekshon kaba la long ha Ïewpamtiah ha ka janmiet Sngi Ba-ar.
Haba kynthoh ïa u MLA ka Nongkrem uba dei u President ka Voice of the People Party (VPP), u la ong ba u MLA u la ong ïa ki paidbah ban pynjop ïa u bad un ai ka jingshakri kaba bha, pynban kaei kaba jia mynta la ar snem, lada leit ki paidbah bad ki kynhun Balang ban ud ban nam, u MLA u ong map ba um don ha ka bor bad phah leit kylla da ki paidbah sha ka Sorkar.
“Ki paidbah kin leit tied jingkhang kumno na ka Sorkar? Ka long lehnohei ban jied ïa uta u nongmihkhmat, ka bha ban ym don MLA”, la kynthoh shuh-shuh u MDC Nongkrem.
Une u kyrtong shimet u la kynthoh tyngeh ruh halor ka jinglong jong u President ka VPP, da kaba ong ba u leit ban ai mukotduma lut kat ïa ba don kiba kren pyrshah ïa u.
“Hangno kan poi ka jaidbynriew? Kane ka long thik kumba synshar donbor u Hitler. Ngin ym shah kum ka jaidbynriew ban wan synshar Hitler namar ka jaidbynriew jong ngi ka long kaba kyrpang, ka jaidbynriew kaba don da ka akor ka burom, ka jaidbynriew kaba tip-briew tip-blei, kaba tip kha tip man. Ngin synshar para ba laitluid para ba ai jait sha ka kmie. Ngin pynim ïa ka riti ka dustur ngin pynim ïa ka jait ka khong”, u la ong.
Na ka liang u Bah Lambor u la ong ruh ba lada u shah jied biang ha kane ka ilekshon, tang kum u MDC ka la biang ïa u ban kit ïa ka lyngkor kaba khiah, da kaba kren shai ba um donkam ban long CEM, Deputy CEM lane EM ban shakri ïa ki paidbah hapoh ka konstitwensi.
