Shillong, Rymphang 12
U kyrtong ka United Democratic Party (UDP) na Pynthorumkhrah-Mawkhar Konstitwensi, Bah James Ban Basaiawmoit, u la ther tyngeh ïa ki MDC kiba la ïoh tam ïa ka tulop ha ka shisnem hadien ba la pynjlan ïa ka samoi treikam kat haduh ba ka Khasi Hills Autonomous District Council ka la pynlut haduh T.50 lak ha ka shibnai bad palat T.6 klur ha ka shisnem katba ïa ki nongtrei ‘casual’ ki siew tulop tang hapoh T.5,000 shibnai.
Ïa kine ki kyntien, u Bah James Ban u la pynpaw haba u ïalap ilekshon ha Riatsamthiah kaba la long ha ka janmiet jong ka Sngi Balang mynta ka taïew.
U Bah Ban uba dei u MDC barim jong kane ka konstitwensi u la kyrpad ïa ki paidbah ba lada un shah jied biang un ïakhun ban pynkiew tulop ïa ki nongtrei ‘casual’ namar ha kane ka pyrthei remdor tang ka bai wai ïing ka poi T.3,000 sa ka bam sa ka bai phah skul khun ka la lut noh.
Shuh shuh, u la ong ba ha KHADC ka la jubor ka jingthungkam da u CEM bad Deputy CEM tang na ka bynta ka jingjop ilekshon jong ki. Kumta u la ong lada ki seng riewlum kin ïoh ban synshar kin khyllie ïa ki kam ba la leh thurmur da kiwei ki seng.
U la pynkynmaw biang ha ka por ba u long MDC, u Bah Pynshngaiñ uba dei u MDC ba mynta uba la long teng kum u CEM, u la pynkylla haba u la rai ban weng Syiem noh hapoh ka Hima Mylliem hynrei u la wan ban thung biang da u juh tang hapoh ar sngi.
U la kynnoh ruh ba ki MDC kiba leit sha KHADC kim dei ba ki leit shna aiñ hynrei ki leit shna nar kaba mut ban shna pisa.
U Bah Ban u la pynkynmaw biang haba baroh ki nongkitkam ka PDF bad ar ngut ki MLA ki la rung sha ka NPP ki don ki paralok kiba wan kylli ba u satar ban nym rung sha ka NPP.
“Nga sngewtynnad ban don ha ki seng riewlum namarkata ngam kwah ban rhah haba ki paralok ki la wan ban khroh namar nga la kmen ban pynheh pynsan ïa ki khun lajong,” u la ong.
