Shillong, Rymphang 12
Ka Meghalaya Board of School Education (MBoSE) khnang ban kham pynsuk bad ban lait na ka jingpep skul shiteng por jong ki khynnah, ka la wanrah ïa ka jingpynkylla ha kaba ïadei bad ka rukom thoh eksam na ka bynta ki khynnah kiba thoh ïa ka eksam matrik ne ka Secondary School Leaving Certificate (SSLC), ha kaba kin ïoh lad ban thoh pat ïa ki sobjek ba ki ‘fail’.
Haba ïoh ban ïakren bad u Director Shillong Regional Office ka MBoSE, Bah M Marbaniang, u la ong ba kat kum ka ‘Notification’ kaba la pynmih ha ka 30 tarik u Nailar 2024, ki pyntip ba na ka liang ka Board kan pynlong ïa ar tylli ki eksam na ka bynta ki khynnah kiba ïaleh ïa ka eksam SSLC, ka ‘Main Exam’ bad ka ‘Supplementary Exam’.
U Bah Marbaniang u la ong ruh ba ka jingpynlong ïa ka eksam na ka bynta ki ‘supplementary subject’ kan lah ban long ha u bnai Ïaïong bad na ka liang ka MBoSE ka la dep ban pynkhreh na ka bynta kane ka eksam, kaba sah ka long tang ban dep noh kane ka ‘main exam’ kaba mynta ka dang ïaid shakhmat.
Ha kaba ïadei bad ka jingpynbeit ïa ki jubab, na ka liang ka MBoSE kan ïaleh ban pyndep noh ha shwa ka taïew ba nyngkong jong u bnai Lber khnang ban lah pynmih noh ïa ka result hapoh ka taïew khatduh jong u Lber.
Ka jingwanrah ka Board ïa kane ka lad na ka bynta ki khynnah ba kin ïoh ban thoh ïa ki ‘supplementary subject’ ka long ba kan khanglad ïa ka jingpep skul shiteng por jong ki khynnah. U la ong ruh ba kine ki khynnah kiba shong klas 10 ki dei kiba dang tlot ha ka bor pyrkhat-pyrdaiñ bad ba kin lait na ki jingsniew ki ban shah ïalam bakla.
U la ong ruh ba lada kine ki khynnah ki ban ïaleh ïa ki ‘supplementary subject’ kin dep ha u bnai Ïaïong ka dang biang ïa ki ba kin sdang ïa ka klas 11 naduh u bnai Jymmang namar ba ka eksam na ka bynta ki klas 11 kan long ha u bnai Kyllalyngkot.
