Mawkyrwat, Rymphang 12
Ka United Democratic Party (UDP) Mawkyrwat Circle ka la nang khlaiñ bad ïoh mynsiem shuh shuh hadien ba palat spah ngut ki nongïalam bad nongkyrshan na kiwei ki seng saiñ pyrthei ki la wan ban pynïasoh sha ka UDP na ka bynta ban ai jingkyrshan pura ïa u kyrtong ka seng, Bah Jeslanroy Nongsiej ha kane ka ilekshon MDC ka ban sa long. Ïa katei ka jingwan pynïasoh ki ‘riew thymmai sha ka sem UDP la sakhi ha ka 12 tarik u Rymphang 2025 ha ka jingïalang paidbah jong ka UDP kaba la long hapoh shlem treikam jong ka seng ha Mawkyrwat.
Ïa kitei ki ‘riew thymmai kynthup kynthei bad shynrang, kiba dei ki nongïalam bad ki nongkyrshan jong ki seng saiñ pyrthei bapher-bapher kiba kynthup naduh na ka HSPDP, Congress, NPP bad Trinamool Congress, la pdiang sngewbha sha ka UDP da u Vice President ka UDP Sengkmie bad MLA ka Mawkyrwat, u Bah Renikton L Tongkhar ryngkat ka jingïadonlang u President ka UDP Mawkyrwat Circle, Bah Shainkor Nongsiej, u kyrtong MDC na Mawkyrwat, Bah Jeslanroy Nongsiej lem bad kiwei kiwei nongïalam bad nongkitkam ka UDP Mawkyrwat Circle.
U Bah Jeslanroy Nongsiej haba ai jingkren u la pynpaw ïa ka jingkmen kaba khraw ïa ka jingwan pynïasoh ki ‘riew thymmai sha ka UDP. U la ïathuh ba ha kine ki khyndiat sngi kin dang kham bun shuh shuh ki ban wan ban pynïasoh bad u la pynpaw ruh ba lada ka UDP kan jop biang ha kane ka kynti kaba mynta kan thaw ïa ka khana-pateng kum ka seng kaba nyngkong eh kaba lah ban jop baroh ar tylli, kata ïa ka ilekshon MLA kumjuh ïa ka MDC ha Mawkyrwat.
