Mawkyrwat, Rymphang 12
Ki nongïalam bad nongkyrshan jong u Martin M Danggo, MLA barim ka Ranikor Konstitwensi ha ka 12 tarik u Rymphang 2025 ki la leit ban pynïasoh noh ïalade bad ka NPP ha ka ïing sah jong u Myntri Rangbah ka Jylla u Conrad K Sangma ha nongbah Shillong.
Kum ban shu kdew, dang ha kine khyndiat taïew ka la don ka jingpynïasoh jong ki nongkyrshan jong u MM Danggo sha ka NPP bad kane ka dang ïai bteng. Kumba ka long mynta baroh ki nongkyrshan jong u MM Danggo ki la rung lut sha ka NPP na ka bynta ban ai ka jingkyrshan pura ïa u Bah Mandilos Nongbri ha kane ka ilekshon MDC ka ban sa long ha ka 21 tarik mynta u bnai.
Haba ïakren bad u Bah Mandilos Nongbri, kyrtong ka NPP, u la ïathuh ba u la trei shitom bha na ka bynta kane ka ilekshon bad u la ïathuh ba ka thaiñ khappud ha kine ki sngi ka la nang khlaiñ nang khlaiñ namar ka jingwan pynïasoh ki nongïalam bad nongkyrshan jong kiwei ki seng saiñ pyrthei ha manla ki jingïalang bad u kyrmen skhem ba ka jingwan pynïasoh jong ki, khamtam ki nongkyrshan jong u Danggo, ka NPP kan ïoh kheit ïa u soh ka jingjop ha kane kynti kaba mynta.
