Shillong, Rymphang 12
U Director Shillong Regional Office ka Meghalaya Board of School Education (MBoSE), Bah M Marbaniang u la pyntip ba na ka liang ka tnat ka la don ka jingïapynbeit ban pynlong noh ïa ka eksam Matrik ne ka Secondary School Leaving Certificate (SSLC) ha u Nohprah 2025.
Haba ïoh ban ïakren bad u Bah Marbaniang u la ong ba ka MBoSE ka la phah ïa ka jingpyntip sha baroh ki skul ba ka eksam na ka bynta ki khynnah ki ban ïakhun ïa ka SSLC ne ka Matrik ka dei ban long noh hapoh u bnai Nohprah.
“Ka jingthmu jong ka sorkar ban pynlong kham kloi ïa ka eksam matrik ne SSLC ka dei namar ba ka kwah ban ailad ïa kito ki khynnah kiba ‘fail’ ha ka eksam ban ïoh pat ban thoh ïa ki sobjek kiba ki fail”, u la ong.
U la ong ruh ba kane ka jingthmu jong ka sorkar ban pynlong kham kloi ïa ka eksam ka long kum ka lad ïa ki khynnah ban ïoh thoh pat ïa ki sobjek kiba ki ‘fail’. Kane kan ïarap ruh ïa ki khynnah ban lait na ka pep skul shiteng por.
“Kane kan dei ka lad kaba biang ïa ki khynnah ba kin ïoh ban pyndep ïa ki jingpule khlem da donkam ban ap ne shong ïing haduh shi snem”, u la ong.
Nalor kane, u la pyntip ruh ba kane kan ïarap shibun bah ïa ka sorkar ha ka ban tehlakam ïa ka jingbun ki khynnah kiba pep skul shiteng por.
