Shillong, Rymphang 12
Ka jingshah prong tuh jong ki ïing ki sem bad ka jingshah tuh jong ki arshaka ka la nang ïai bteng na kawei ka sngi sha kawei pat. Kane ka la pynlong haduh ba ki trai ïing ne trai arshaka ne kali ruh kim shngaiñ shuh ban ieh ïing ne pynïeng ïa ki kali bad arshaka ha phyllaw ïing ne harud surok.
Katkum ka khubor kaba la ïoh na ki pulit la ong ba ka Kong Valentina Bareh ka la ujor ba ha ka 10 tarik mynta u bnai, ha ka por kumba 4.15 janmiet, ki runar bym lah ban ithuh ki la prong tuh hapoh ka ïing jong ka kmie jong ka, kaba don ha Mawblei Madanrting, Block-B, Shillong bad ban rah tuh ïa ki ar tylli ki mobile phone bad kawei ka laptop.
Ha kawei pat ka jingjia shah tuh, u Sengbath N Sangma u la ujor sha ki pulit ba hapdeng ka miet jong ka 9 bad 10 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-AC-8031 na ka thaiñ Urkaliar ha nongbah Shillong.
U Divyanshu Singh ruh u la ai ka jingujor sha ki pulit ba hapdeng ka miet jong ka 9 bad 10 tarik mynta u bnai, ki runar bym lah ban ithuh ki la prong tuh ha ka quarter sah ka jong u, kaba don ha Mawpat, Waheh, Shillong bad ha kaba ki la rah tuh ïa kawei ka laptop, kawei ka mobile phone bad ki shoh shkor ksiar kiba shongdor kumba T.80,000/-.
Ha kawei pat ka khubor, ka Kong Natalis Sun ka la ujor sha ki pulit ba ha ka 6 tarik mynta u bnai ha ka por kumba 3 baje janmiet, ki runar bym lah ban ithuh, ki la tuh ïa ka pla jong ka, kaba don ka pisa kumba T.4,000/-, ka ATM card bad ki kot ki sla kiba donkam na ka dukan jong ka, kaba don ha Lummaralong Pyndengumiong ha Eastern West Khasi Hills.
