Shillong, Rymphang 12
Kawei ka dukan kyiad ne Wine Shop kaba don ha Umnget ha Ri-Bhoi District ka la shah tuh, ha kaba ki runar ki la rah ei ïa ka kyiad kaba shongdor da ki lak tyngka bad ruh ban tuh ïa kiwei ki tiar.
Katkum ka khubor na ki pulit la ong ba u Bah Lingstar Nongrum u la ai ka jingujor ba ha ka 9 tarik mynta u bnai, ha ka por kumba 3 baje dang step phyrngab, ki runar bym lah ban ithuh ki la prong tuh hapoh katei ka dukan kyiad, bad ki la ïoh ban tuh kawei ka laptop kaba shongdor kumba T.70,000/-, ka pisa kaba long T.40,000/- bad ka kyiad kaba shongdor haduh kumba T.2.5 lak. Ha kawei pat ka khubor, u Amrendar Kumar Singh uba dei u Manager jong ka Harlie Service Station kaba don ha Umling, Ri-Bhoi District u la ujor sha ki pulit ba ha ka 7 tarik mynta u bnai ha ka por kumba 3 baje dang step phyrngab, uwei u briew ba la suba jur bad kyrteng u S Jha u la tuh ïa ka pisa kaba long haduh T.4.65 lak na kane ka Service Station. Ha kaba ïadei bad kine ki kam shah tuh, na ka liang jong ki pulit mynta ki dang pynlong ïa ka jingtohkit ban lap ïa ki jingshisha bad ban thwet ïa ki briew kiba donkti ha kane ka kam.
