Shillong, Rymphang 13
Ka Nongïalam jong ka National People’s Party (NPP) Kong Ampareen Lyngdoh ka la ong, “Katba dang don ka Sorkar MDA, katba dang don ka Sorkar NPP, Ngin ïap shwa ma ngi ban ïa phi, ngin ym khot ïa phi sha surok, ngin leit ma ngi ngin ïasaid ma ngi lada don ka aiñ ka ban pynma ïa phi. Ai ba ka suloi kan siat nyngkong ïa ngi ki nongïalam ym dei ïa phi u paidbah”.
Kane Nongïalam NPP ka la kren ïa kane ha ka jingïalang pan jingkyrshan na ka bynta u kyrtong MDC uba dei ruh u Kurim, Bah Fantin J Lakadong, kaba la long ha ka janmiet Sngi Palei ha Malki.
Haba ther tyngeh ïa ka seng VPP kaba leit sha ki paidbah ban ïalap dawa pyntreikam ïa ka Article 371 hapoh ka Jylla, ka la ong ba wat pynbiej ïa u paidbah, bad ka Khyrnit ba Hynriew ym lah da lei-lei ban pynkylla sha ka Article 371.
“Ki don kiba ong ba kata ka district council ka long ka bym don bniat, bad ki la batai shaphang ka Nagaland ka Mizoram ym sngewthuh sngewthaw shuh. Phi kren hakhmat u paidbah u bym don jingtip eiei ruh ïa ka aiñ, hynrei da ai ïa phi ka por ha ‘Assembly’ wut phi phet, para ma ki ruh ha kajuh ka seng kim ïa lah ban sngewthuh iwei-ïa-iwei”, ka la ong.
Ka Kong Ampareen kaba dei ka Myntri ba khmih ïa ka tnat Aiñ ha ka Jylla, ka la ong, ai ba kine ki aiñ kin pyrkhat da ki nongïalam ba la dep shah jied da u paidbah.
“Wan sha ‘Assembly’ wan ngin ïakren para nongïalam wan ngin ïakren para nongtip aiñ, wat pynkulmar thiah ïa ki paidbah”, ka la ther shuh shuh.
Halor ka jingdawa ka VPP ïa ka Article 371 ka la ong, “Ka jingkylli kaba mih hadien ka jingkren ka jong ki ka long tang kawei, haba phi pyrshah ïa ka district council, balei phi pynïeng kyrtong te ban ïaleh MDC? La bha ba ynnai ïaleh shuh. Ïa kiba tang shitda ka kam ruh pat ïohi ki ang la kumba tang ma ki kiba stad, kam pher phi sngew stad phi don ka hok, hynrei wat thok ïa u paidbah wat pynshohbiej ïa u paidbah”.
Ka la ong ba kum ka Jylla kan pynim ïa ki aiñ jong ka Khyrnit ba Hynriew katba kim pat don kita ha ka shuki. “Ngi la ïohi kaei kaba jia ha ki por mynshwa ïa ki katto-katne tylli ki aiñ ba ki la mushlia. To ngeit ïa nga ko nong Malki ka jingduhnong ka dei ïa ngi u khun Khasi-Khara”, la ong ka MLA na East Shillong.
Ka la ong, wat pynthame ïa ki paidbah ba ka Khyrnit ba Hynriew kam don bniat ban peit ba ki aiñ jong ka ri India kin ym lah ban wan sha kane ka Jylla. Ka la batai ruh ba ki aiñ kum ka Citizenship Amendment Act (CAA) bad ka Uniform Civil Code (UCC) ki dei ar tylli kita ki aiñ ba shyrkhei na ka bynta ki rit paid kum ki riewlum ha Meghalaya, hynrei ka CAA bad UCC khlem lah ban pyntreikam ha ki jaka jong ki district council.
“Nga ong ïa kine ki nongïalam ba la sngew stad palat, wan sha ka dorbar thaw aiñ, ngin ïathalaiñ para ba ïa tip aiñ,” ther biang ka Kong Ampareen.
