Shillong, Rymphang 13
U Nongïalam ka National People’s Party (NPP) uba dei ruh u Myntri ka Sorkar MDA-II, Marcuise N Marak ha ka Sngi Palei, u la ong ba ka jingkylli kam mih satia ba ka Sorkar Jylla kan pynshlur ïa ka kam tih dewïong be-aiñ lane kiwei-kiwei ki kam be-aiñ hapoh ka Jylla.
U la ong kumno ka Sorkar kan ïatreilang bad kine ki kam be-aiñ. Hato ki pyrkhat ba ka Sorkar Jylla kan pynshlur ïa kum kine ki kam be-aiñ?
“Ka Sorkar MDA jong ngi ka treikam haba shai bad phi lah ban ïohi ïa ki sienjam ba la shim da u Myntri Rangbah ka Jylla Conrad K Sangma, ka lynti ba u ïalam ïa ka Jylla kaba phi lah ban ïohi hi dalade”, u la ong.
U Marcuise u la ong ba lada don kiba ïohi ïa kine ki kam be-aiñ, dei ban wanrah sha ka jingtip jong ka Sorkar namar ka Sorkar ka don hangne ban khang ïa kine kiei-kiei baroh.
U Myntri u la kren ïa kane haba kynthoh ïa ki jingkynnoh jong ki MLA ka Liang Pyrshah haba kdew ïa ka kaiphot shipor ne ‘interim report’ ba la phah dang shen da u Nongbishar ba la shongthait, BP Katakey uba khlieh ïa ka komiti ba la thung da ka Kashari Meghalaya High Court.
Haba kyntait ba ka don ka jingtih dewïong be-aiñ, u Marcuise u la ong ba kam don satia kum kane ka kam bad lada ka don ruh, ka bor jong ka aiñ ka don da ka ban kem ïa ki bad nga tharai ki la don ki nongkhaïi kiba la dep ban ai jubab kaba la leit sha ki bor District. U la ong ba um tharai ba kan don ka jingtih dewïong be-aiñ ha South Garo Hills.
Lah ban kdew ba u Nongbishar ba la shongthait, Justice (Retd) B.K. Katakey uba dei u dkhot ba marwei jong ka committee ba la thung da ka kashari Meghalaya High Court u la bthah ban aiti ïa ka kaiphot jong ka sorjamin ba la leh na suiñ halor ka jingdon jong u dewïong bad ïa ka jingtih dewïong beaiñ. Ha katei ka kaiphot u la pynpaw ba haduh mynta ka jingïoh kurup ïa u dewïong be-aiñ ka dang don ha South Garo Hills, hynrei ha kiwei ki district kam don eiei katkum ka kaiphot na ki Deputy Commissioner naduh u Naiwieng mynshem snem haduh u Kyllalyngkot mynta u snem.
