Shillong, Rymphang 13
Kawei ka longkmie Khasi ka bym kwah ban pynpaw kyrteng kaba sah ha Shillong kam lah shuh ban sei pisa na State Bank of India hadien katto-katne bnai ba uwei u briew na jylla Andhra Pradesh u la phah pisa sha ka ‘account’ jong kane ka longkmie kaba long tang T.623.
Une u briew na Andhra Pradesh la tip kyrteng kum K Nagendra. U la phah pisa sha kane ka longkmie Khasi ha ka 29 tarik Jymmang 2024 lyngba ka Google Pay. Kumta kane ka longkmie ka la leit ujor noh sha ka State Bank of India ha Shillong ha ka 20 tarik u Jylliew 2024 namar ka sngewpher ïa ka jingpoi pisa khlem ka jingtip ïa uta u briew.
Kane ka longkmie kam poi pyrkhat ba kan shah khang (block) ïa ka account namar da ka thep pisa ka long beit hynrei ynda ka la donkam ban sei pisa da ka Gpay bad na bank ha u bnai Risaw 2024 kam treikam shuh, kumta ka la leit ujor noh sha ki pulit ka Cyber Crime.
Shuh shuh, kane ka longkmie ka la ïakynduh shibun ki jingeh namar kam lah ban sei ïa ka pisa namar u trai jong katei ka account uba la phah pisa u la phah khang ïa baroh ki account. Namar kata, ka la pynlong ïa kane ka longkmie ba kan leit kyrpad ïa ka Director General of Police ka jylla Kong I Nongrang kaba la shimkhia ban ïakren ïa u khlieh duh ki pulit na Gujarat namar une u trai account uba sah ha Andhra Pradesh u la phah khang lyngba ki pulit na Gujarat.
Haba ïakren bad kane ka longkmie, ka la ïathuh ba ïa kane ka pisa kaba la poi ha account jong ka, kam dei ba la phah hi da utei u trai na Andhra Pradesh hynrei ki don ki briew kiba leh thok kiba ïoh ïa ka account jong u ban phah pisa shaduh 987 ngut ki briew ha kylleng ka ri India ha kaba palat 18,53,000 lak la dep sei na account jong utei u briew.
Ka la ïathuh ba dei na kane ka daw ba une u trai u la phah khang lut ïa baroh kitei 987 tylli ki account kiba la ïoh ïa katei ka pisa naduh kiba ïohpdiang 9 tyngka haduh kiba la ïohpdiang palat lak tyngka.
Kumta ka la kyntu ïa ki paidbah jong ka jylla ba kin da husiar haba ki pyndonkam Google Pay haba phah pisa ïa ki briew ki bun kiba leh thok haba ïadei bad ka jingthep bad sei tuh ïa ka pisa.
