Shillong, Rymphang 13
Ka jingshah thok pisa jong ki briew lyngba ki jingsiew ne kor online ka dang ïai bteng na kawei ka sngi sha kawei pat bad watla kiba bun ki shah thok hynrei ki dang bun pat kiba shah pynngop na kawei ka por sha kawei pat.
Katkum ka khubor kaba la ïoh na ki pulit la ong ba uwei u nongshong shnong jong ka nongbah Shillong u la ai ka jingujor ba ha ka 11 tarik mynta u bnai, ki runar bym lah ban ithuh, ki la thok pisa ïa u haduh T.99,867/- lyngba ka kor online.
Kumjuh, kawei ka briew kaba dei ka nongshong shnong jong ka dong ha nongbah Shillong, ka la ai ka jingujor sha ki pulit ba ha ka 1 tarik mynta u bnai, ha ka por kumba 4 baje janmiet, uwei u briew u bym lah ban ithuh, u la thok pisa ïa ka haduh T.10,000/- lyngba ka phone.
Ha kiwei pat ki khubor shah tuh, u Bah Rapbor Kharnaior u la ujor sha ki pulit ba ha ka janmiet jong ka 11 tarik mynta u bnai ha ka por kumba 7.30 eiei, ki runar bym lah ban ithuh ki la tuh ïa kawei ka mobile phone bad kawei ka printer kaba dei ka jong u Vincent Pakynteiñ, na ka kali jong u ha Mawlai Nongpdeng, Shillong.
Ha kawei pat ka khubor, u Bah Dondor Rapmai u la ai ka jingujor ba hapdeng jong ka miet 10 bad 11 tarik mynta u bnai, ki runar bym lah ban ithuh ki la tuh ïa ka kor tem jingrwai (music system) kaba shongdor kumba T.8,000/- na ka kali ka jong u, kaba la pynïeng ha Lad Wahkdait, Laitkor, Shillong.
