Shillong, Rymphang 14
U Bah Thomas Passah uba dei kyrtong ka Khun Hynñiewtrep National Awakening Movement (KHNAM) bad ruh kum Working President ka seng ban aireng ha ka ilekshon MDC sha ka Khasi Hills Autonomous District Council (KHADC), u la ong ba ha ki snem kiba kham mynshwa, la sakhi ba ïa ki syrnot Scheduled Tribe la aiti sha ki paidbah lyngba ka District Council hynrei da ka jingknieh noh ka Sorkar Jylla ïa ka bor bad ka iktiar jong ka District Council ban leh ïa kane ka bynta lyngba ki ophis treikam jong ki Deputy Commissioner, la sakhi ba ha ki snem kiba bun tylli ka la don ka jingpyndonkam bakla ïa kine ki syrnot riewlum kaba kiba bun ki briew ki bym dei ki Khasi ki la ïoh ïa kine syrnot.
“Ngi la leit sha ka District Council ban pynbor ïa kane ka bynta ba donkam ba ka la dei ka por ba ïa ka syrnot Scheduled Tribe, la dei ban pynphai noh sha ka District Council khnang ba ki paidbah kiba kwah kin hap ban shim napoh ka District Council khnang ba ka jinglong kyrpang ka Jaitbynriew riewlum jong ngi kan dang neh bad skhem”, ong u Bah Thomas.
Ha ka jingai jingkren ha ka jingïalang ïalap ilekshon kaba la long ha ka janmiet jong ka 13 tarik Rymphang, 2025, hakhmat ka Robert Hospital, u Bah Thomas u la ong ha ki khyndiat sngi kiba dang shu dep, la ïohi ba na ka liang u Chief Executive Member (CEM) ka KHADC, Bah Pynïaid Sing Syiem u la leit ban ujor sha ki bor ba dei khmih halor ka jingmih kyrteng ki barjylla ha ka thup kyrteng jong ki nongthep vote na Nongthymmai Constituency ha ka ilekshon MDC. Hynrei kaba sngewsih ka long ba ha ka por ba ka seng KHNAM ka leit ban ujor, na ka liang ka District Council kam shimkhia halor kane ka bynta kaba pynpaw ba ka District Council ka khlem pyndep hok satia ïa ki kamram jong ka kumba la pynkupbor da ki kyndon aiñ bapher-bapher.
“Kaba sngewsih ka long ba ha ka por ba ngi leit ban rah ïa ki mat-ki jura kiba skhem bad ha ka por ba ngi rah ïa ki sakhi-ki satar ha ryngkat ki jingshisha kiba pynskhem ban kyrpad ïa ki CEM ba kin thoh da ki Aiñ kiba skhem khnang ba kan ym wan ka jingmynsaw hynrei mynta ynda la dier ka por, ki juh ki CEM ki leit ujor bad ong ba balei ha ka Electoral Roll ki paw ki kyrteng jong ki bym dei kita trai ri-trai muluk ban ïashimbynta ha ka ilekshon”, ong u Bah Thomas.
U la ong ba na ka liang ka seng ka la pyntip sha ka District Council ba hapoh ka thaiñ Marwet kumba 35-40 tylli ki Dorbar Shnong, la bat Rangbah Shnong da ki briew ki bym dei na ka Jaitbynriew Hynñiewtrep kaba long ka jingpynkheiñ ïa ka Aiñ jong ka Hima Mylliem, 2007 hynrei na ka liang ki bor kiba don ha ka Council ki la leh kyllut halor kane ka bynta ruh.
“Ka dei na kane ka daw ba ki khyndew-ki shyiap jong ngi khamtam sha khappud ki lah nang syntuid bad ka don ruh ka jingpynkheiñ ïa ka Land Transfer Act Regulation, 1971”, ong u Bah Thomas.
