Mawkyrwat, Rymphang 14
U khlieh nongïalam ka NPP, Conrad K Sangma ha ka 13 tarik u Rymphang 2025 u la hiar sha Mawkyrwat ban pan jingkyrshan na ki paidbah kane ka konstitwensi ïa u Bah Carness Sohshang uba dei u kyrtong MDC na ka NPP ha kane ka ilekshon MDC ka ban sa long.
Ha kane ka sngi u Conrad Sangma u la leit ïuh kjat ha bun tylli ki shnong jong ka Mawkyrwat bad u la sdang nyngkong na ka shnong Shngimawleiñ bad ïaid ter-ter sha Mawthawpdah, Rangblang, Umdohlun, Mawlangwir, Rangmaw bad Sakwang kum shi bynta ban ïoh ïakynduh markhmat bad ban ïohsngew da la ki jong ki shkor ïa ki jingeh jong ki nongshong shnong kane ka konstitwensi.
Ha kane ka sngi, u Conrad u la ïohpdiang shibun ki Dorkhas (Memorandum) na ki shnong bad ki kynhun bapher-bapher jong ka dong ka thaiñ.
U Conrad haba ai jingkren u la ong ba kane ka ilekshon MDC ka long kaba kongsan bad kaba donkam haduh katta-katta na ka bynta ki paidbah kane ka thaiñ, namar kane ka dei ka kabu ban ïoh ïatreilang bad ka Sorkar ryngkat bad u Myntri Rangbah.
U la ïathuh ruh ba kum ka Sorkar ka don shibun ki prokram kiba ka kwah ban leh na ka bynta ki paidbah hynrei khlem don ki nongmihkhmat bad ki nongïalam kiba lah ban ïatreilang bad ka Sorkar, ka long kaba eh ban ai ïa ka roi ka par wat la ngi kwah eh ban ai ïa ki, ong u Conrad.
Namar kata, u Conrad u khot bad wer ïa ki paidbah ka Mawkyrwat konstitwensi ba kin phah ïa u Bah Carnes bad ka Sorkar da kaba pynjop biang ïa u ha kane ka kynti ba mynta khnang ba ka roi ka par kan tuid sha ki shnong ki thaw bad sha ka konstitwensi baroh kawei.
