Shillong, Rymphang 14
Ka Kong Grace Mary Kharpuri kaba dei ka kyrtong jong ka National People’s Party (NPP) bad MDC ba mynta ka Nongskhen ka la ong ba kum ka Nongmihkhmat kam lah ban biang shispah na ka shispah, hynrei ka la pyrshang kat kaba lah ban leh ïa kaba bha tam na ka bynta ki paidbah.
“Ngi pyrshang ban trei hok leh hok ïa ka kam, ym dei ba shu wan shukor ïa phi pynthame ïa phi. I thamula haba ngi peit ha kine ki sngi ba ki don kiba shu lapmiet ban pynbiej ïa ki paidbah”, ka la ong haba kren ha ka jingïalang pan jingkyrshan ha Nongshken ha ka Sngi Palei.
Haba ïathuh ïa kaei kaba la jia ha ka por ba long CEM u President ka VPP, Bah Ardent M Basaïawmoit, ka la ong ba u la shah dawa ban hiar shuki kum u Chief Executive Member (CEM) ka KHADC ha u snem 2014 namar ba u la wanrah ïa ka mat hapoh ka executive committee ban pynkylla ïa ka dustur da kaba ai jait kpa.
“Kata ka agenda na ka liang uba bun balang ha ka EC ngi khlem pdiang, namar kata ka agenda ka ban pynkylla khongpong ïa ka riti ka dustur jong nga jong phi”, ka la ong.
Ka la ong ba kam pat ju jia koit hapoh ka histori jong ka district council ban shah dawa hiar shuki u CEM.
“Ban shah dawa ban hiar shuki ka long ka jingjah burom phi. Kumno keiñ paidbah ngin ai ïa u lakam synshar ha kine ban synshar hapoh district council. Kaba ima ïoh lashai ki ïoh ha ka bor shu shah mait lut katba don, pyrkhat sani bha, ka don ka jingma bad lada ki kwah ban pynkylla ïa ka riti dustur jong ngi kin sa leh biang”, la ong ka MDC kaba la jop haduh lai sien na Nongshken.
Kane ka Nongmihkhmat ka la kynthoh tyngeh ruh ïa ka VPP halor ka jingbyrngem ïa ki dorbar shnong bad lashai lada ki wan ha ka bor, la thikna bad khlem artatien kin thombor lut ïa baroh.
Da kaba jer kyrteng ruh ïa u Bah Ardent Miller Basaïawmoit, ka la ong ba u kam ba u ieid jaidbynriew hynrei u dei u khawpud namar dei ma u, uba nyngkong eh napdeng 8 ngut ki MDC u ban iehnoh kam kum u MDC ba sheptieng ïa ka jingshah mait kyrteng kum u MLA hadien ba la mynjur ïa ka aiñ khang bat arkam da ka Sorkar Congress ba la ïalam u Dr, Mukul Sangma.
“Ki ieh ïa ka shuki kaba ïada ïa ka jaidbynriew, hato kim dei ki khawpud? Phin ai biang ïa kine. Lashai da wan kano-kano ka aiñ kaba tyllep ïa ngi kin ong pynduh noh ïa ka district council”, ka la ong.
Ka MDC ka la kyntu ruh ïa ki paidbah ba kin da pyrkhat bha bad ban ym shah ïalam bakla lane biej ha ki jingkynnoh bapher-bapher.
Ka Kong Grace ka la ong ba la lai sien ba ka la long MDC kam shym la leit ban shu pynbiej ïa ki paidbah, hynrei ka la pynpaw ka jingbynñiaw ba ka saiñpyrthei bad ka por ilekshon ka la pher bak-ly-bak haba ïanujor mynta bad ki snem ba la leit.
Ka la ong ba ha kane ka kynti kaba mynta kam ïohi ban jop ilekshon da ki nongrim, hynrei ki paidbah ki la shah ïalam bakla ha ki social media.
Ka Kong Grace ka la kyntu jur ïa ki paidbah ba kin sngewthuh ïa ki briew kiba shu shim kabu, kiba ber bih ïa ki paidbah kiba lui-lui bad maham ruh ïa ki briew kiba leit ban pynbiej da ka ktien jali-jaum.
