Shillong, Rymphang 14
Hadien ba kawei ka lad pathai ha ki rynsan social media ‘The Garo Hills Times’ ha ka sngi Palei ka la pynsaphriang ïa ka khubor lamler ba u Myntri ka Sorkar Jylla, Marcuise N Marak ba u la shah siat ïap, na ka liang u Myntri u la ujor da ka ejahar pyrshah ïa kita ki nongpynmih ïa ka ‘social media page’ ‘The Garo Hills Times’ namar ka jingpynsaphriang ïa ka khubor lamler.
Ha ka ujor ba la aiti sha u Superintendent of Police ka East Garo Hills, u Myntri u la ong ba ha ka 13 tarik Rymphang 2025, kane ka lad pathai khubor social media ka la pynbna thok ba u la shah siat ïap bad ba ka kynhun Garo National Liberation Army (GNLA) ka la shim jingkitkhlieh ïa kane ka kam.
“Ka jingpynsaphriang ïa kum kine ki khubor lamler ka dei tang ka jingpyrshang ban pynsyier bad pynrit mynsiem, ïalam bakla ïa u paidbah bad pynthut ïa ka shongsuk shongsain,” ong u Marcuise ha ka ejahar.
U la ong shuh shuh ba kane ka khubor lamler ka la buh ka jingma kaba khraw hakhmat u paidbah bad kaba dei ban leh da kaba tyngeh.
U Marcuise u la kyntu ïa ki Pulit ba kin pynkloi ka jingtohkit bad ban leh eiei katkum ka aiñ pyrshah ïa kito kiba donkti ban pynsaphriang ïa kane ka khubor lamler.
Ha ka ejahar u Myntri u la bsut lang ruh ïa ka jingthoh jong ka ‘The Garo Hills Times’ kum ka sakhi bad kyntu ban shim ïa ki sienjam kiba tyngeh ban tehlakam ïa kum kine ki kam thok kam shukor hadien-habud.
Ka ‘The Garo Hills Times’ ha ka Sngi Palei ka la pynbna thok ba ka GNLA ka la siat ïap ïa u Myntri Sorkar uba dei u MLA ka Williamnagar, u Marcuise N Marak.
