Shillong, Rymphang 16
U MDC ka Mawkynrew, Bah Martle N. Mukhim, ha ka Sngi Saitjaiñ u la kren shai ba ka khubor halor ka jingleit pynïasoh jong u sha ka United Demo-cratic Party (UDP) ka long kaba bakla bad haduh mynta u dang dei hi u nongïalam jong ka Hill State People’s Democratic Party (HSPDP).
“Ngam lah ban ong kumno-kumno ruh, hynrei ka jingshim kabu jong ka pyrthei haba ïadei bad ka kam seng, don kiba ong ba nga-ngan ïasoh noh sha ka UDP, kata ka long kaba bakla shi kat dei eh,” ong u Bah Mukhim haba kren sha ki lad pathai khubor.
Haba kdew ba ban shu pdiang ïa ka jingong jongno-jongno ba um dei shuh u dkhot ne nongïalam jong ka seng (HSPDP), u MDC u la ong, “Nga dei u nongïalam jong ka seng. Namar nga don hapdeng ka jingpang, bun ki kam ki bym lah kiar…kiar balei, namarba ka long shabar ka jinglah jong nga hapdeng jong ka jingpang…ym dei ba nga kiar na kano-kano ka daw, hynrei kane ka jingpang kam ailad ïa nga ban ïa pyrkhat, ban ïa batai, ban ïatrei ban ktah.”
Ha kajuh ka por, u la ong ba ha ka jingshisha ym dei ban ïa sngewthuh bakla bad haduh mynta u dang dei hi u President ka Mawkynrew Circle bad u Vice-President ba rangbah jong ka HSPDP.
Hashuwa, u la ïathuh ba ha ka jingïakynduh bad katto-katne ki nongïalam ka seng jong ka Mawkynrew Circle, u la pynsngew ba u don hapdeng ka jingshitom bad ki don shibun ki jingjia kiba la jia ha ka jingïaid lynti jong u haba ïadei bad kane ka ilekshon MDC naduh ba um sngew lah shuh ban ïakhun ïa ka ilekshon ban wan.
“Ngi la ïa pyrkhat katto-katne ban ïoh ïa u kyrtong, hynrei hapdeng ka jingpang, ym shym la poi sha ka jingïasngewthuh jingmut bad namar kane ka daw, baroh ki ‘riew rangbah da kawei ka jingmut, ki la ïa rai ban aiti noh sha ka Sengkmie ba kan leh ïa kaba donkam haba ïadei bad ka jingjied ïa u kyrtong,” u la ong.
Kumta ka seng ka la buh da u Bah Torist Syiem ban long u kyrtong jong ka HSPDP na Mawkynrew konstitwensi.
“Don ruh kiba ong ba nga kynshoit ban phah ïa ki briew shato-shane…kam long kumta. Nga kren hok ïa kane, ka long namarba nga don hapdeng ka jingpang, khlem lah ban lum ïa ka jingïasngewthuh jingmut kawei hapoh ka jong Circle, jong ki nongïalam baroh. Kumta nga la shu ieh ha ka jingpynïaid jong ka Sengkmie bad kumta ka seng ka la rai ban jied ïa u Bah Torist ban long u kyrtong,” u la ong.
Shuh shuh u Bah Mukhim u la bynrap, “Une u dei u kyrtong ba pura uba ngam lah ban ong ba ngam ïadonkti namar la phah hi da ka Circle sha ka seng ban leh ïa kaba donkam. Nga ieh ha ka jingstad jong ki nongthep ‘vote’ ka konstitwensi khamtam eh ki nongkyrshan jong ka seng.”
