Shillong, Rymphang 16
U kyrtong ka Congress ban ïakhun na Shella konstitwensi, Bah Asterland Khyllep u la ong ba la kumba 25 snem la synshar da ka United Democratic Party (UDP) hapoh ka Shella konstitwensi bad ki paidbah ki la kwah mynta ban don ka jingkylla bad dei na kane ka daw ba ka ilekshon ka long kaba kham kynjah hapoh Shella.
Ha ka jingïakren bad u Bah Asterland Khyllep hadien ba la wai ka jingïalang ïalap ilekshon ba la pynlong ha Umkhabaw kaba dei ka shnong kaba bun kiba shong-sah da ki jaidbynriew Garo, u la ong ba ki paidbah kiba shong basah ha kine ki thaiñ ki ai ka jingkyrshan bad ka jingshaniah ïa nga kum u briew uba dei napoh ka Shella konstitwensi.
“Ki la don ki jingïakren kiba ong ba ma nga kum u trai shnong na Shella nga kham tlot ha kine ki shnong kiba la shong shnong da ki paralok Garo, hynrei nga la pynshisha ba nga don ka jingkyrmen ha kine ki shnon”, u la ong.
U Bah Asterland u la pynpaw ruh ïa ki jingeh kiba ki paidbah nongshong shnong ha kine ki thaiñ ki ïakynduh khamtam ha ki jaka-puta, ki lynti-syngkieñ bad kiwei-kiwei kum ki nongshong shnong ki ïakynduh.
U la ong ruh ba ka la don ka jingpyrshang ban shna ïa ka jingkieng kaba dei na shiliang sha shiliang ka wah, hynrei kam shym la urlong na ki daw jong ka jingdkoh ka tnat kaba dei khmih ha kaba ki païa ki la khyllem noh. U la pyntip ruh ba na ka liang ka tnat bad ka sorkar ki la pyrshang katba lah ban pynurlong ïa kane ka jingkieng tad haduh kine ki sngi. “Ka sorkar ka la sdang ban wad jaka sha kiwei pat ki bynta bad u kyrmen ba kine kin sa urlong ha kine ki snem ban sa wan”, u la pyntip.
Haba kylli, u la ong ba dei tang ka seng Congress kaba la wan ban ïuh kjat sha kane ka shnong Umtham ban pynshongshit mynta ka sngi, hynrei ha kine ki sngi kiba la leit noh ka kynjah bha kane ka ilekshon bad ka jingkynjah jong kane ka ilekshon ngam lah ban sngewthuh na kino ki daw.
“Kaei kaba nga sngewthuh shai kdar ka jingkynjah jong kane la ilekshon ka dei halor jong ka jingkwah jong ki paidbah ban pynthymmai ne ban ai noh ïa kata ka jingkylla ha kane ka konstitwensi, namar la kumba 25 snem la synshar da ka UDP bad ha kane ka sien ba mynta ki paidbah baroh kawei ka konstitwensi ki la kwah ïa ka jing kylla” u la ong
U Bah Asterland u la ong ruh ba nga shim ïa kane kabu ban phah ïa ka khubor sha baroh kawei ka konstitwensi ba sngewbha ban ai ka jingkyrshan ïa nga u kyrtong ka Congress da kaba shon ïa ka shap ha ka dur jong ka kti.
