Shillong, Rymphang 16
U Special Project Director ka SSA, u Swapnil Tembe u la pyntip ba ki don haduh 500 tylli ki skul ki bym pat shym la ioh jingithuh na ka Sorkar, lane ki bym pat pynrung kyrteng ha ka Unified District Information System for Education (UDISE).
Haba kren bad ki lad pathai khubor hadien ka jingïalang bishar kam jong ka tnat Pule Puthi, u Swapnil Tembe u la ïathuh ba kine ki 500 tylli ki skul kim don satia ha ka UDISE kaba dei ka kyndon jong ka Sorkar Pdeng ban ithuh ïa kawei-pa-kawei ka skul hapoh ka Ri.
U Tembe u la ong ba ka jingithuh ka mut ba ki skul ki donkam ban ïoh ïa ki katto-katne ki kot ki sla na ki bor Sorkar hashwa ba kin treikam.
“Ki don ki kot ki sla kiba la ai da ki bor sorkar, kum ïa ki skul Elementary ki DSCO ki dei ban ai ïa ka jingithuh. Ka lah ban long ka jingbit ban plie, ka lah ban long ka jingithuh ba shipor, ka lah ban long ka jingithuh kaba neh, hynrei namar ki jingleh ba mynshwa kine ki skul ki la treikam khlem ka jingithuh”, u la ong.
U Tembe u la ong ba ka Sorkar India ka la bthah ïa baroh ki Sorkar Jylla ba kin shim khia ïa kine ki skul bym pat ïoh jingithuh.
“Kumta ngi la bthah ïa ki ophisar ban leit jurip bad pynshisha la ki don ne em ïa ki jingdonkam ba kongsan khnang ba yn lah ban ai jingithuh noh ïa kine ki skul”, la ong une u ophisar.
U Tembe u la ong ba ka tnat pule puthi kan sa pynmih shen ïa ka rukom treikam ba la buh ryntih na ka bynta baroh ki nongshim bynta ban bud shwa ban plie ïa kano-kano ka skul hapoh ka Jylla.
U la ong ba kito kiba kwah ban sdang ïa ka skul ki hap ban pan jingbit, ki hap ban pyni ba ki hap ban donkam ïa ki jingtei bad nangta yn sa ai jingbit ban plie, ha kaba ki lah ban sdang bad hadien lai snem lada ki leh bha, lada don ka jingpynrung kyrteng ki khynnah skul, yn ai ïa ka jingithuh ba neh bad yn pynmih ïa u UDISE code.
Ha kawei ka liang u Tembe u la pyntip ba ka tnat Pule Puthi ka Jylla ka la pynkhreh ban thung kam noh ïa 500 ngut ki nonghikai ha ki skul Lower Primary bad Upper Primary ka Sorkar, kiba don hapoh ka jylla.
Une u ophisar u la ïathuh ba ha u snem ba la dep, ka tnat ka la dep ban thung kam kumba 1000 ngut ki nonghikai ha ki skul LP, bad mynta la pynkhreh ïa ka Roster bad shisien ba lah ïoh jingmynjur ïa ka jingpynbna na ka bynta ki kam ba lait kam yn sa pynmih noh bad yn sa sdang noh ïa ka jingthep kam thepjam.
