Jowai, Rymphang 16
U MLA jong ka Jowai konstitwensi u Ma Wailadmiki Shylla u la ong ba lada ka Sorkar NPP ka khlem leh eiei te kumno ki nongïalam jong ka Voice of the People Party (VPP) ki ïoh pyndonkam ïa ka surok ba la shna da ka Sorkar.
U Ma Wailadmiki u la kynthoh ïa ka VPP ha ka jingïalang ïalap ilekshon na bynta u kyrtong jong ka NPP na ka Jowai North u Dr. DI Kjam ha madan Ladthadlaboh, Jowai ha ka miet 15 tarik Rymphang.
U MLA jong ka Jowai u la bteng shuh shuh da kaba ong ïa ki nongïalam jong ka VPP ba kin leit ujor da ka FIR ïa ki Myntri, ki MLA bad ki MDC jong ka NPP lada ki dei ki nongtuh ym ba kin shu hylla shu pyrta ha lynti syngkieñ.
U Ma Wailadmiki u la ong, u President jong ka Meghalaya Pradesh Congress Committee u Ma Vincent H Pala u la kynnoh ïa u Symbud Myntri Rangbah jong ka Meghalaya u Ma Sniawbhalang Dhar ba u donkti ha u drok bad u Ma Sniawbhalang u la dawa ïa u Ma Pala ba un leit ujor da ka FIR pyrshah ïa u bad lada um lah ban pynshisha un ngat ha ka ‘defamation’ ne ka kam pynthohbria bad u Ma Sniawbhalang u la dawa ka bai mynraiñ khmat kaba 100 klur. U la kam ba khatduh khatwai u Ma Pala un hap ban pan map.
U Ma Wailadmiki u la ïathuh shaphang ki kam ki jam kiba u la leh naduh ba u la shimti kum u MLA kaba kynthup ïa ka jingshna maramot ïa ka surok Jowai kaba 33-kilometer lyngba ka pisa na ka World Bank, ka jingpyntreikam ïa ka MCH Hospital ha Panaliar, ka jingwan jong ka Meghalaya Games ka la wan shibun bah ka jingmyntoi ha ka sor Jowai namar la ïoh ban pynphuh- pynphieng ïa ka MDC Hostel, ki madan ïalehkai bad kiwei kiwei.
U la ïathuh ruh ba shen yn sa pyntreikam noh ïa ka Nursing College ha Rilum Jaiñtia bad yn sa shna noh ïa ka surok by-pass na Lad College sha Jingkieng Myntdu bad yn sa sdang noh shen ka jingshna ïa ka jaka bret ñiut ne ka landfill.
Haba ïathuh shaphang ki kam ki jam jong ka Sorkar NPP, u MLA jong ka Jowai u la ong ka jylla Meghalaya hadien 50 snem jong ka jingïoh jylla kan sa ïoh ïa ka State University nalor kiwei kiwei.
U Ma Wailadmiki u la ong ba hadien ba la pynmih ïa ka State Anthem ki MLA jong ka NPP na Rilum Jaiñtia ki la leit sha u Myntri Rangbah ban dawa pynkylla ïa ka State Anthem namar bym don ka ktien Pnar bad kumta la pynsangeh noh shipor ka jingtem ïa ka State Anthem bad mynta la kynthup lang ïa ka ktien Pnar ha ka State Anthem.
