Shillong, Rymphang 17
Ki pulit ki la ïoh ban bat noh ïa saw ngut ki briew bad ruh ban kurup ïa u drok bad kiwei kiwei ki tiar pyndonkam haba dih drok.
Katkum ka khubor na ki pulit la ong ba ha ka 12 tarik mynta u bnai, hadien ka jingïoh jingtip kaba bniah, ki pulit ki la ïoh ban bat noh ïa kawei ka kali Mahindra Scorpio (ML13-A-3752) ha kaba la shong da saw ngut ki briew ba kynthup ïa u Toseng R Sangma (26 snem), Rakkan R Marak (27 snem), Sanchubirth S Marak (22 snem) bad u Safik Alam (21 snem) ha Balachanda, Selsella ha West Garo Hills. Na kane ka kali bad ki briew ki pulit ki la ïoh ban kurup noh ïa u drok ba la suba heroin uba don ka jingkhia kumba 4.11 gram, khatwei tylli ki tyndong, hynriew tylli ki insulin syringes, ar tylli ki sterling water injections, saw tylli ki mobile phone bad kiwei kiwei. Na ka liang ki pulit ki la kurup noh ïa katei ka kali kumjuh.
