Shillong, Rymphang 17
Ha ka nohphai sngi jong ka 17 tarik u Rymphang, 2025 ha ka por kumba 1 baje tam eiei, kawei ka dukan kaba die ja bad sha ïa kaba la tip kyrteng kum ka Owayoo kaba don ha Motphran ka la kem ding kynsan namar ka jinglait lyer kawei ka tyndong lyer shet kaba don ha ka kamra shet jong katei dukan.
Na ka liang U Nongsaiñ Hima haba ïoh ban ïakren bad ka trai jong katei ka dukan die bam, ka la ïathuh ba katei ka jingkem ding ka dukan ka la jia ha ka por kumba 1:30 baje eiei na ka daw ka jinglait kynsan jong uwei u pipe jong ka tyndong lyer shet. Nangta, ka la ïathuh ba ha ka por ba jia katei ka jingjia, ka don ha kawei ka bynta jong katei ka dukan bad mar sien ïohi ba la kem ding ka dukan sha ka bynta ba shapoh, ka la leit ban hiar shapoh bad ban pynlip ïa ka tyndong lyer shet bad theh da ka um ban tem noh ïa ka ding ba kan pur sa sha kiwei pat ki bynta jong ka dukan.
Ka la ïathuh ruh ba kat ban da wan poi ka kali pynlip ding, la lah ban tem hi noh ïa ka ding.
Ka la ïathuh ba ha ka por ba kem ding ka dukan, ki don ki briew kiba dang bam ha katei ka dukan hynrei mar sien ïohi ba la meh ka ding, ki la mih pynsted shabar bad ka la ïathuh ruh ba ha katei ka jingkem ding, kam shym la don satia kano-kano ka jingmynsaw na kane ka jingjia hynrei u don tang uwei u briew uba la tyngkhuh ïalade ha ka por ba u mareh shabar ka dukan. Ka la ïathuh ba ka jinglut-jingsep ha katei ka jingjia ka la kot kumba T.5,000 eiei.
