Shillong, Rymphang 17
Ka Hynñiewtrep Integrated Territorial Organisation (HITO) ha ka 17 tarik u Rymphang 2025 ka la leit ban buh jingthoh ha u Chief Electoral Officer u BDR Tiwari ban ujor ha kaba ïadei bad ka jingpynkheiñ aiñ ka National People’s Party (NPP) da kaba kynnoh ba ki briew jong ka NPP hapoh West Jaiñtia ki pynbiej ïa ki paidbah lyngba ka skhim Pradhan Mantri Awas Yojana Gramin PMAY-G ban thep ïa ki kyrtong jong ki.
U samla Balajied Jyrwa uba dei u General Secretary ka HITO Shillong City, u la ong ba ka seng ka la ïoh ki jingujor na ki paidbah ka West Jaiñtia Hills halor kane da kaba ki kylli ruh ba ka PMAY-G skhim ka dei shisha ne em ka skhim kaba ïoh lyngba u MLA.
U samla Balajied u la ong ba kane ka jingpynthame ïa ki paidbah ka long ka jingpynkheiñ ïa ka Model Code of Conduct, nangta u la pynshai ba ka skhim PMAY-G ka wan na ka Sorkar Pdeng ym na ka Sorkar Jylla ha kaba baroh ki duk ki suk bad ki nongkyndong kin ïoh ïa kane ka skhim.
Kumta na ka liang ka seng ka la kyrpad ïa u CEO ba un peit bad ban leh eiei halor kane khnang ba ka jingjied ïa ki nongmihkhmat kan long kaba khuid bad suba.
