Shillong, Rymphang 17
U Working President ka United Democratic Party (UDP), Bah Paul Lyngdoh, u la ong ba ka long kaba suk ban pyrta ieid ri na Nongkrem, Nong-spung hynrei ban pyrta ha Lower Mawprem, kin shah pynduh ‘security’ syndon.
Ïa kane u Bah Paul u la kren ha ka jingïalang ïalap ilekshon kaba la pynlong ha ka janmiet Lah Sngi U Blei ha Kyrbom na ka bynta u kyrtong ka UDP u Bah Auguster Jyrwa u ban ïakhun ïa ka ilekshon MDC na Jaïaw-Mawprem Konstitwensi.
U Bah Paul u la ther da kaba tyngeh ïa kito ki nongïalam kiba kren ieid jaidbynriew da kaba ong phi kren ieid ri ieid jaidbynriew na Nongkrem na Nongspung bad na kiwei ki jaka ka suk bha hynrei wan ha Mawprem phin shah pynduh ‘Security’ syndon.
U la ong ba ka Lower Mawprem ka dei ka ‘general seat’ ha kaba la mihkhmat mynshwa da ki phew snem da ki Joshi bad Chaudhury hynrei mynta la mih da u Lyngdoh.
Shuh shuh, u la ong ka politik jong ka tyngam kan nym neh slem, ka politik jong ka kam kan neh, ka kam shi kham ka nia te shi kudam.
U la pynkynmaw ruh halor ka mat jong ka MUDA ha ki snem ba la leit ba ka la don ka jingaibor ban rung sha ki khapsor bad ki nongkyndong. “Ngi donkam ban pynduh ïa ka bor jong ka, paidbah phi la sakhi ba ngi, ngi la leh kumno bad kiwei ki leh kumno. Na ka bynta ban aibor shuh ïa ka district council bad ban ym ailad ïa ka jingsloit bor jong ka MUDA halor ka thaw ïing thaw sem bad ka jingai jingbit ban shna ïing, ban sloit ïa kata ka kam, la don kiba pynïaid da ka proseshon, bad tang poi ha State Central Library la lympat bad ki pulit, bad kane ka kam ka khlem poi shano-shano. Ngi pat hadien ba shimti ma ngi ïa ka Executive Committee ha district council, ngi la wanrah ïa ka ‘draft’ bad leit rah sha ka Sorkar kumno ban aibor ïa ka district council bad ban sloit noh ïa ki bor na ka MUDA ha khapsor bad nongkyndong, ha kaba kane ka kam ka la wan urlong,” la ong u Bah Paul. U la ong, “Ngam artatien ba da ka jingdon ïa ka kynhun kaba khlaiñ bad kaba shemphang, ka UDP kan sa ïalam ha kane ka EC ka ban wan.”
U Bah Paul u la pan jingkyrshan jong ki paidbah na ka bynta u Bah Auguster bad lada ki paidbah ki pynjop ïa u Bah Auguster kan long ka jingkyrkhu ïa ka konstitwensi.
U la kyntu ïa ki paidbah ba kumba ki ai ka jingkyrshan ïa u ha kine ki snem ba la dep, ba kin kyrshan ruh ïa u Bah Auguster bad ban pynjop khnang ba kin ïatreilang ban pynkhlaiñ shuh shuh ïa ka ri bad ka jaidbynriew.
