Shillong, Rymphang 17
U President ka National People’s Party (NPP), Bah Prestone Tynsong, u la kyntu jur ïa ki paidbah ba kim dei ban ngeit biej ïa ka jingkren jong ki briew kiba shu kynnoh ïa kiwei, kim tip ïalade ki don haei.
Haba kren ha ka jingïalang pan jingkyrshan na ka bynta u kyrtong ka NPP na Mawphlang-Diengïei, Bah Lamphrang Blah ha Mawngap, u Nongïalam ka NPP uba dei ruh u Symbud Myntri Rangbah ka Jylla, khlem da jer kyrteng u la ong ba ka rukom kren jong ki teng-teng ki paidbah ki kum ngeit ba imat ki nong-ïalam ha ka Sorkar ki dei shisha kumta.
“Ngi haba ngi pynïaid ïa ka Sorkar ngi hap bud ryntih ïa ka aiñ. Ka don kaba ngi ong ka ‘Financial Rules’ kaba ngim lah lano-lano ban bakla. Ka Sorkar India ka don ïa ka tnat ba laitluid, ka CAG kaba kim mab ïano-ïano ruh lada ki ïohi ba don kata ka jingbamsap”, la ong u Bah Prestone, ha kaba u la kyntu jur ïa ki paidbah da kaba ong, “Paidbah baieid sngewbha wat ngeit, sngewbha da wad ïa ka jingshisha. Ka jingkren jong kito ki briew kiba shu kynnoh ïa kiwei kim tip ïalade pat ki don haei”.
U la ong shuh shuh ba ka jingshah kynnoh ka NPP ym sngewthuh sngewthaw shuh, kata ka bamsap, ka tuh ka thiem, hynrei ym don uwei ruh uba leit ujor da ka ejahar halor kita ki jingkynnoh, pynban ki mareh leit ujor ejahar tang ïa kiba kren ha social media ka bym don jingmut eiei ruh em, kaba dei tang ka jingpynlut kai ïa ka por.
“Ka rukom kren jong ki kumba ki da lap thikna kata ka bamsap, ka tuh ka thiem la kumba lap ïa ka jingshisha. Kaba nga phylla haduh mynta, kita ki briew kiba kynnoh ngam pat ïohi shisien ruh ba kin leit sha police station ban ai FIR teng, ka lah ban long ïa u Prestone ïa u Conrad lane ïa ki Myntri Sorkar”, la ong u Nongïalam ka NPP, bad bynrap shuh shuh ba ki mareh wut-wut ban leit ujor ejahar ïa kiba kren ha rynsan social media.
“Kaba nga ïohi ba ki leit ai FIR tang ïa kito kiba kren ha ki social media, ka bym don jingmut eiei ruh em, yn leh aïu ba phi pynlut por hapoh social media, kato baroh ka dei tang ka jingpynlut kai ïa ka por namar ba kim lah ban pyntreikam ïa ka”, u la ong.
Na ka liang u Bah Prestone u la kyrpad ïa ki paidbah ka Mawphlang-Diengïei ban kyrshan pura ïa u Bah Lamphrang Blah namar ka NPP ka buh hakhmat eh na ka bynta ban wanrah ïa ki kam pynroi bad ka ïoh ka kot ha man la ki konstitwensi.
“Ka dei ka histori ha ka Jylla Meghalaya jong ngi naduh ba ngi ïoh ïa ka district council ha u snem 1953, ba ha kane ka samoi treikam ryngkat ka jingtreilang bad ka Sorkar, kiba bun bha ki aiñ kiba ka district council ka la lah ban pynurlong. Ka daw ka long ba ngi don ka jingsngewthuh jingmut hapdeng ka Sorkar bad ki bor ba synshar ha district council”, la ong u Bah Prestone.
