Shillong, Rymphang 18
Ka jingshah prong tuh jong ki dukan bad ka jingshah tuh jong ki arshaka ka la nang ïai bteng na kawei ka sngi sha kawei pat. Kane ka la pynlong ïa ki trai ïing ne trai arshaka ne kali ruh kim shngaiñ shuh ban ieh ïing ne pynïeng ïa ki kali bad arshaka ha phyllaw ïing ne harud surok.
Katkum ka khubor na ki pulit la ong ba u Rajesh Kumar Mattu u la ai ka jingujor ba ha ka step jong ka 15 tarik mynta u bnai, ki runar bym lah ban ithuh, ki la prong tuh ïa ka dukan jong u kaba don ha Punjabi Lane, Shillong bad ban tuh ïa ki mar bam mar dih kiba shongdor kumba T.7,100/-.
U Jakir Ali Sk ruh u la ujor sha ki pulit ba ha ka step phyrngab jong ka 15 tarik mynta u bnai, ki runar bym lah ban ithuh, ki la tuh ïa ka arshaka jong u kaba don ïa u registration number ML05-AD-7046 na Suzuki Trust Centre Showroom kaba don ha Fourth Furlong, Polo, Shillong.
U Jiab Uddin ruh u la ai ka jingujor ba hapdeng ka miet jong ka 13 bad 14 tarik mynta u bnai, ki runar bym lah ban ithuh ki la tuh ïa ka arshaka jong u kaba don ïa u registration number ML05-AE-3086 na ka thaiñ Laban, Shillong.
Ha kawei pat ka jingjia, u Bijoy Chakraborty u la ai ka jingujor sha ki pulit ba ha ka 13 tarik mynta u bnai, uwei u briew ba la tip kyrteng kum u Aditya Pareek, u la shim wai ïa ka kali jong u hynrei um shym la siew pat ïa ka pisa bai wai ka jong u, kaba la kot shaduh ka T.1.65 lak.
Kumjuh, na ka liang jong u Abu Shama u la ujor sha ki pulit ba ha ka 16 tarik mynta u bnai ha ka por kumba 1 baje dang step phyrngab, uwei u briew ba la tip kyrteng kum u Sanakul Islam (19 snem) u la tuh ïa ki tiar donkam na ka dukan jong u, kaba don ha Panbari ha West Garo Hills. Halor kane ka jingujor, ki pulit ki la kem noh ïa utei u briew.
U Shazidur Rahman u la ujor sha ki pulit ba ha ka por mynsngi jong ka 15 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML08-G-8578 na ka thaiñ Rajabala ha West Garo Hills.
U Resapiul Islam ruh u la ujor sha ki pulit ba ha ka step jong ka 11 tarik mynta u bnai, kata ha ka por kumba 5 baje eiei, u la lap ba ka arshaka jong u, kaba don ïa u registration number AS01-EE-0658 ka la jah na ka jaka pynïeng ha shnong Bholarbhita kaba hap hapoh ka thanat Phulbari ha West Garo Hills.
