Shillong, Rymphang 18
Ka VDP na shnong Mawrapad ha East Khasi Hills ha ryngkat bad ki nongshong shnong ki la ïoh ban kem noh ïa uwei nong Bangladesh katba u dang thmu wan rung sha India.
Katkum ka khubor na ki pulit la ong ba u samla Omarlovingstone Shangdiar, uba dei u dkhot ka VDP jong ka shnong Mawrapad u la ai ka jingujor ba ha ka 15 tarik mynta u bnai, ha ka por kumba 7.30 janmiet, ma u ryngkat bad ki nongshong shnong jong ka shnong ki la ïoh ban bat noh ïa uwei u nong Bangladesh ba la tip kyrteng kum u Md. Rubel Alam (30 snem), katba u dang don ha lynti na Balat sha ka thaiñ Mawsynram. Na ka liang jong ki pulit ki la kem noh ïa une u nong Bangla.
Ha kawei pat ka khubor, la ong ba ha ka 14 tarik mynta u bnai, hadien ka jingïoh ïa ka jingtip kaba bniah, ki pulit ki la bat noh ïa kawei ka kali Innova kaba don ïa u registration number AS01-AZ-3669 kaba la shong da san ngut ki suba nong Bangladesh kita u Adony Khatun (28 snem), Ahidul Mullah (35 snem), ka Rita Begum (35 snem), ka Duli Begum (40 snem) bad uwei u heprit ba dang saw snem ka rta, kiba la rung shapoh u pud u sam ka India khlem ki kot ki sla kiba biang.
Ïa kane ka kali bad ki briew la ïoh ban bat ha Nongpoh, Ri-Bhoi District bad na kine ki briew la ïoh ban kurup noh ïa ki kot ki sla thok ban pynshisha kum ki nong India, kita ka Aadhaar card bad PAN card).
