Shillong, Rymphang 18
U kyrtong shimet ha ka shap jong u Mawbynna na Mawlai konstitwensi, Bah Teiborlang Pathaw, u la kawang ktieh ïa ki nongthud daw bad ki nongwoh dong, ba la kynthoh ïa ka kam shimet ba u la trei, kata da u President jong ka seng thymmai.
Haba kren ha ka rynsan ïeng lang jong ki kyrtong ha Mawlai Nonglum, u Bah Pathaw u la ther ruh ïa ka jingkren jong u President ka seng thymmai ha ka Sngi Ba-ar da kaba buh jingkylli, ka don bynta aïu ka kam ba u trei bad ka ilekshon MDC ba uta un kren pyntieng ba kane ka kam ba u trei bad kaba u ïarap ïa ki briew kan sa kut noh?
“Kim ïoh daw ban ïa ka kam MDC ba nga la trei ha kine hynriew snem namar ba nga la ai ka jingshakri kaba paka tam ïa ka shnong Mawlai baieid jong ngi”, u la ong.
U la ong ba ki don ar bynta ki jingwad daw, kiba hun noh haba la pynshai bad don ruh kiba woh dong ba da la pynshai ki thud daw sa da kumwei.
“Arphew snem ki jingshakri kiba nga la ai na ka bynta ki longïing lyngba ki kam ki jam kiba nga la lah ban ïarap. Ka don bynta aïu ka kam jong nga bad kata ka district council ilekshon? Tang kawei, ban shu wan shu kynthoh ïa kaei-kaei ka bym dei ka bynta jong ka ilekshon ka long kaei-kaei kaba sngewsih ba kan mih na ka shyntur jong une u rangbah”, la ong u Bah Pathaw khlem da jer kyrteng ïano-ïano.
U Bah Teibor u la ong ba arphew snem u la pynskhem ïa ka kam jong u, bad ha kine ki hynriew snem ka jinglong MDC ym don uwei ruh uba pyntieng ba ka kam jong u kan khyllem noh.
“Ka jingkyrkhu u Blei bad ka jingkyrkhu ki hajar ki longïing kiba nga la ïarap, kane ka kam jong nga kan nang skhem shuh-shuh, namar kine ki longïing ki ju duwai man la ka sngi na ka bynta ka kam kaba nga trei”, la ong u Bah Teibor.
