Shillong, Rymphang 18
U National President ka National People’s Party (NPP), Conrad K Sangma u la kyntu ïa ki paidbah ka Ri Khasi bad Jaiñtia ba kin kyntait ïa ki seng saiñpyrthei kiba pyrshang ban wanrah ïa ka jingsngew ïapher jaidbynriew ha ka ilekshon KHADC bad JHADC, ka ban long la 21 tarik Rymphang.
“Ka ilekshon ban wan kan dei ka kabu ban ai ïa ka jubab kaba bang eh sha kito ki seng saiñpyrthei kiba pyrshang ban phiah bad wanrah ïa ka ïapait-ïapra ki briew jong ngi”, ong u Conrad haba kren ha ka rynsan ïalap ilekshon ha Dangar hapoh ka Mawsynram konstitwensi ha ka Sngi Ba-ar.
U la ong ba dei ban kyntait bad kynjat ïa ki seng saiñpyrthei kiba pyrshang ban phiah ïa ki briew, haba u la bynrap ba hap ban ïeng pyrshah jur ïa ka saiñpyrthei kaba pynpait-pynpra bad ban ym ailad ïa ki seng saiñpyrthei kiba pyrshang ban wanrah ïa ka jingïashun bad ïapait-ïapra hapdeng ki para briew.
U Conrad u la ong ba ka jingthep ‘vote’ ka dei ka hok ba la pynkup bor da ka Riti Synshar ka Ri ïa ki paidbah bad ban jur ba kam don satia kano-kano ka jingthmu ban ym shah ïa ki trai muluk ba kin leit thep ‘vote’ lane pynduh ïa ki jaidbynriew riewlum ba rit paid ha ka ilekshon KHADC bad JHADC.
U Conrad u la hiar ïalap ilekshon ruh ha Cherrakata, Pataghat bad ha Mawsynram ban pan jingkyrshan na ka bynta u kyrtong ka NPP, Bah Alvin Sawkmie.
Haba pynkynmaw ïa ki jingkular ba la pynurlong hadien ka ilekshon KHADC 2019, khamtam ha ki thaiñ khappud ka India-Bangladesh, u la ong “Ngi la ithuh ïa ki jingeh ba la ïakynduh da ki briew jong ngi kiba sah ha khappud, bad ngi la wanrah ïa ki prokram ban pynthikna ïa ka roi ka par bad ka bha ka miat jong ki paidbah”.
U la pynpaw ba ki paidbah ha khappud ki la shah iehbeiñ la slem bha, hynrei ka Sorkar ka la pyndep ïa ki jingkular da ka jingtei ïa ka surok Balat-Dangar-Ryngku, kaba la kular ha ka por ïalap ilekshon KHADC 2019.
U Myntri Rangbah u la ban jur ruh ba ka Sorkar NPP ka ngeit skhem ha ka bha ka miat jong ki paidbah bad ka la pynurlong ïa baroh ki jingkular. U la pyntip ha ka jingïalang ba ka projek ba T.50 klur kan sa nang pynsuk ïa ki paidbah haba kdew ruh ïa ka surok Weiloi-Mawsynram ba T.100 klur, kaba la pyntrei mynta hapoh ka projek jong ka World Bank.
“Ki Liang Pyrshah ki lah ban kren kat kaba ki mon hynrei kim pat ju shna ïa ka surok ne ka jingkieng hapoh ka thaiñ”, u la ong.
U la bynrap shuh shuh da kaba ong, “Ka NPP ka la pynthikna ïa ka jingshna surok bad ka jingkieng ha Khasipara kaba dang pynwandur mynta bad shen yn sa pyndep noh ïa ka”.
Ha kajuh ka por u la kyntu ïa ki paidbah ba kin ai biang ka jingshaniah jong ki ha ka NPP kumba ki la jied ïa ka Sorkar ha ka ilekshon KHADC 2019, kaba pynkupbor ban wanrah ïa ka roi ka par.
Haba pynpaw ba ki jaka khappud ki donkam ïa u nongïalam uba lah ban treikam, u Conrad u la ong, “Nga la ïaid ïalap ilekshon ha ki jaka khappud ha ka por ilekshon bad ki paidbah ki la ïatylli bad ka NPP. Ki la kut jingmut ban trei bad nang pynkhlaiñ ïa ka NPP ban nang lah pynroi ïa ka Jylla Meghalaya”.
