Shillong, Rymphang 18
Ka Synjuk Ki Rangbah Kur Ka Bri U Hynñiewtrep da ka jingkitkhlieh na ka bynta ka bha-ka miat jong ki paidbah ka jaidbynriew, ka la mih shakhmat ha kane ka kynti kaba mynta ban saiñdur ïa ka saiñ pyrkhat jong u paidbah kumno ban jied lane ban pyni ïa ki paidbah ban jied ïa ki kyrtong ha kane ka ilekshon MDC sha ka Khasi Hills Autonomous District Council (KHADC) bad Jaiñtia Hills Autonomous District Council (JHADC) ka ban long ha ka 21 tarik Rymphang, 2025.
Haba kren sha ki lad pathai khubor ha Shillong Press Club ha ka 18 tarik u Rymphang, 2025, u Working President ka Synjuk, u Bah Erwin K Syiem Sutnga, u la ong ba kane ka ilekshon MDC kaba mynta ka kham pher bha ban ïa kaba ïanujor bad kiwei pat ki ilekshon ha ki por kiba la dep ha kaba la sakhi ba ki la mih shibun kiei-kiei ki jingjia ki bym sngewtynnad bad kum ka Synjuk ki Rangbah Kur kaba dei ka thymmei pyrkhat jong ka jaidbynriew, ka shim ïa ka jingkitkhlieh ban mih shakhmat ban saiñdur ïa ka jingmut-jingpyrkhat u paidbah khamtam ïa ki Kur namarba ki dei ki Kur-ki Jait kiba pynlong ïa ka jaidbynriew bad ka jaidbynriew khlem ki Kur kam don jingithuh da kaba kyrpad ïa ki paidbah khamtam ïa ki samla ba kin pynshong nongrim bha hashwa ba kin thep ïa ki vote jong ki.
“Kum ka Synjuk, ngi kyrpad ïa ki nongthep vote ba kin pynshong nongrim bha namarba ka Sixth Schedule ka dei ka stieh jong ka jaidbynriew bad kane ka stieh mynta ka la long palat ïa ka 70 snem ba ka don bad ka treikam. Hooid, ki don ki jingduna hangne-hangtei bad ki don ki jingkhmih lynti ruh ba kan treikam kham bha shuh-shuh hynrei ïa kita kin sa wan hadien ka ilekshon namar ka 125th Amendment jong ka Sixth Schedule ka dang ap”, ong u Bah Erwin.
U la ong ba kum ki paidbah nongthep vote khamtam ki samla, ki dei ban pynshong nongrim bha haba ki thep ïa ki vote jong ki khnang ba ka longdur-mandur jong ka jaidbynriew kan nym duh noh.
Haba ïadei bad ka sang-ka ma ha ka shongkha-shongman, u Bah Erwin u la ong ba kan don ka jingktah kaba khraw bha lada ki paidbah ki bakla ban jied ne rai ha ka 21 tarik u Rymphang, 2025 namar kan plie ïa ka jingkhang khamtam ïa kita kiba kwah ban ai jait kpa, kin ïoh ïa ka lad-ka lynti kaba shyrkhei bad kane kan wanrah pat ka jingeh kaba khraw bha ïa ka jaidbynriew.
“Lada ngi duh noh ïa kata ka durkhmat ha ka Longkur jong ka jaidbynriew, kum ka jaidbynriew kaba ai jait kmie, kane ka dei ka jingap ïa ngi ha ka jingma”, ong u Bah Erwin.
Shuh-shuh, u la ong ba kum ka jaidbynriew ka donkam ïa ki nongmihkhmat kiba sngewthuh ïa ka jingkordor jong ka Khyrnit ba Hynriew, ka jingkordor jong ka Riti Synshar ka Ri bad kiba sngewthuh ba ki don ïa ka bynta kaba kyrpang hapoh ka imlang-sahlang jong kane ka Ri.
“Namar kata ka daw, ngi donkam ïa ki nongmihkhmat ba lada kim pat sngewthuh ïa ka Sixth Schedule, ki donkam ban long kita kiba kloi ban pule-ban wad, ban puson bad ki ban ïatreilang namar ha ka por ba la seng ïa ka Khyrnit ba Hynriew, kam dei ba la seng halor kano-kano ka rukom treikam ka seng”, ong u Bah Erwin.
Na ka liang u President ka Synjuk Ki Rangbah Kur Ka Bri U Hynñiewtrep, Bah R L Kharpran, u la ong ban long kum u MDC ka dei ka kam kaba kham khia ban ïa ka kam kum u MLA namarba hapoh ka District Council, ka donkam ban thaw ïa ki aiñ ban ïada ïa ka khyndew-ka shyiap, ban ïada ïa ka riti-ka dustur bad ban ïada ïa ka Kur-ka Jait.
