Shillong Rymphang 18
U Bah Auguster Jyrwa uba dei u kyrtong ka UDP ban ïakhun ïa ka ilekshon MDC na Jaïaw-Maw-prem Konstitwensi u la ong ba ka jingmih ka jong u ban ïakhun ïa kane ka ilekshon ka dei namar ba kum u samla uba la dep ban shakri ïa ka jaidbynriew ha ki por ba la leit, u angnud bad thrang ban shakri kham bha shuh shuh khamtam lei ban pynneh pynsah bad pynkhlaiñ ïa ka jaidbynriew.
“Nga don ïa ka nongrim kaba skhem ban shakri ïa u paidbah bad ïa ka jaidbynriew, khamtam lei ba nga la dep ban shakri kum u Nongïalam ka KSU ïa ka jaidbynriew la palat 18 snem bad mynta nga don ïa ka jingthrang ban bteng ïa ka jingshakri ïa u paidbah khamtam ha ka ban pynneh-pynsah bad ban pynkhlaiñ ïa ka jaidbynriew,” la ong u Bah Auguster haba kren ha ka jingïalang paidbah kaba la pynlong ha Jaïaw Pdeng ha ka janmiet Sngi Ba-ar.
Shuh shuh haba ai jingkren u Bah Auguster u la ong, “Lada phi ailad ïa nga ba ngan long u nongmihkhmat u jong phi kum u MDC ka Jaïaw-Mawprem Konstitwensi, ngi dang donkam shuh shuh ban pynkhlaiñ ïa ka khyndew ka shyiap, ka khaïi pateng, ka synshar-khadar, ka shongkha-shongman, ka riti ka dustur, ka ïoh ka kot, ki Dorbar Shnong, ki Dorbar Raid, ki Dorbar Kur. Kine ki dei kiei kiei kiba ngi dei ban nang pynkhlaiñ bad nang pynjanai shuh shuh ïa ka Sixth Schedule bad ïa ka District Council”.
U Bah Auguster u la ong ba ka UDP ha ka jingïoh ban ïalam ïa ka District Council ka la lah ban mynjur ïa ka Regulation of Administration of Land Act 2021 bad la ïoh ruh ban thaw ïa ki aiñ jong ka Building Bylaws bad la nang pynkhlaiñ shuh shuh ïa ka khaïi-pateng bad kiwei kiwei ki bynta kiba ka UDP ka la ïoh ban leh.
Une u kyrtong ka UDP u la kyrpad ruh ïa ki paidbah ba kin kyrshan lem ïa u ha ka ilekshon bad ban thep ïa ki vote ki jong ki ban pynjop ïa u ha kane ka ilekshon kum u nongmihkhmat sha Khasi Hills Autonomous District Council.
