Nongpoh, Rymphang 18
Ki Rangbah Shnong jong ar tylli ki shnong ba kynthup ïa u Bah R Syiem na Liarsluid bad u Bah K Kharbihkhiew na Itsohpa-ir, ha ka Sngi Ba-ar ki la pynpaw ïa ka jingsngewkhia jur halor ka jingshah thad madan jong u MDC ka Umroi, u Bah Rangkynsai Kharbuki halor ka jingdonkti ka jong u ban mushlia ïa ki kam jied Rangbah Shnong hapoh ka Umroi konstitwensi.
Kum ban shu kdew, ïa katei ka kam thad madan, la sei da uwei u rangbah ha ka jingïalang ïalap ilekshon ‘common platform’ kaba la pynlong ha ka shnong Liarsluid khyndiat por hadien ba u Bah Rangkynsai Kharbuki, MDC ka Umroi uba la mih noh na katei ka jaka, kata hashwa ba ki paidbah kin ïoh buh jingkylli. Ha katei ka rynsan la don ryngkat ruh u kyrtong shimet, u Bah George B Lyngdoh.
Kitei ar ngut ki nongïalam shnong ka Liarsluid bad Itsohpa-ir, ki la pan ïa ka jingpynshai na utei u rangbah uba thad madan ïa katei ka kam ban pynshisha la katei ka sur ne ka jingïakren ka dei jong u MDC ka Umroi ne em, da kaba ong ba kane ka la ktah jur khamtam ha kane ka por ilekshon bad bynrap ruh ba lada um lah ban pynshai, na ka liang ka seng ka hap ban pyrkhat da kumwei pat khnang ba kane ka kam kan shai.
