Shillong, Rymphang 18
Ka Dorbar Shnong Mawngap Khlieh Shnong ha ka 18 tarik u Rymphang, 2025, ka la pynlong ïa ka jingjied Rangbah Shnong ha katei ka shnong ïa kaba la pynïaid da ka Hima Mawphlang ha ryngkat ka jingdon jong ki ophisar ka Khasi Hills Autonomous District Council (KHADC) kum ki nongpeit pyrman.
Ha katei ka sngi nalor ki ophisar ka KHADC, ka la don ruh ka jingsyrtap ki bor pulit ha katei ka shnong kum kiba peitngor khnang ba kan ym mih kano-kano ka jingkulmar ha ka por ba la pynlong ïa ka ilekshon jied Rangbah Shnong ha kane ka shnong.
Ha kane ka ilekshon ki don ar ngut ki kyrtong kiba ïakhun ïa ka kam Rangbah Shnong kiba kynthup ïa u Bah Kyntiewborlang Langstieh bad u Bah Ostarland Khyriem.
Ki don kumba 202 ngut ki paidbah kiba lah ban thep ïa ka vote jong ki hapoh ka shnong Mawngap Khlieh Shnong hynrei kiba leit thep ïa ka vote ki don tang kumba 51 ngut eiei katba 150 ngut tam pat kim shym la treh ban thep ïa ka vote kum ka dak ban pyrshah ïa ka jingbym ailad jong u Lyngdoh ka Hima Mawphlang ïa u Rangbah Shnong barim, u Bah Khambor Kharshandi ba un thep kyrteng kum u kyrtong Rangbah Shnong.
Hadien ba ki 51 ngut eiei ki la pyndep ïa ka jingthep vote, ki ophisar ka District Council ki la shimti ïa ka synduk ban rah sha ïingbishar kumba ka ïingbishar ka la bthah ïa ki.
Haba pyrshang ban kylli ïa u Lyngdoh jong ka Hima Mawphlang halor kane ka kam Rangbah Shnong, na ka liang utei u Lyngdoh u la ong ba um kwah satia ban kren eiei shabar namarba kane ka dei ka kam ïing-kam sem jong ka Hima.
