Shillong, Rymphang 18
U MLA/MDC barim ka Mawlai konstitwensi uba aireng ha kane ka ilekshon kum u kyrtong shimet ha ka shap jong u Mohkhiew, Bah Process T Sawkmie u la ther tyngeh ïa ki briew ba pyndonkam ïa ka ktien u Blei ban beiñ ban khoh bad thad madan katba mon ïa kiwei.
Haba kren ha ka rynsan ïeng lang ba la pynlong da ka Mawlai Town Dorbar (MTD) ha Mawlai Nonglum ha ka Sngi Ba-ar, u Bah Sawkmie da kaba siat pharshi u la ong ba u sngew synei ba kito ki Nongïalam seng saiñpyrthei ki kren riewblei ba ki ieid ïa u Blei, ïa ka ri bad ka jaidbynriew ha ka beiñ ha ka khoh.
“Kito ki Nongïalam seng saiñpyrthei ki kren ‘riewblei ba ki ieid ïa u Blei, ïa ka ri bad ka jaidbynriew ha ka beiñ ha ka khoh. Nga ong tang kane kawei ha Mawlai jong ngi ha kane ka kynti kaba mynta lyngba ka ‘common platform’ ngim ïabeiñ namar ngi ieid jaidbynriew”, la ong u Nongmihkhmat barim ka Mawlai.
U Bah Sawkmie u la ong ba ha Mawlai ki samla ki donkam ka jingkylla, kaei ka jingkylla ba la ïoh? U la buh jingkylli.
“U Blei um shah ïa nga ba ngan beiñ ba ngan khoh da kaba pyndonkam ïa ka ktien jong u Blei. Nga pyndonkam da ka ktien jong u Blei, ngam beiñ ngam khoh ngam thad madan katba nga mon”, u la ong.
U la ong, kiba ieid jaidbynriew ki dei kiba ïarap ïa kiba duk ba suk, kiba treikam Sorkar, kiba trei kam lajong, kiba treikam jong u Blei bad kiwei ruh ki ieid jaidbynriew da kaba wanrah ïa ka nam ka burom ïa ka jaidbynriew, bad kata ka dei ba ieid jaidbynriew ym ban shu ong ba ym lah haba ki don kiba donkam jingïarap khamtam kiba duk ba suk.
Haba kynthoh tyngeh ïa u MLA ka Mawlai, u Bah Sawkmie u la pynpaw ka jingbynñiaw ba haduh mynta ym don satia ka jingbuddien ïa ki skhim bad projek kam pynroi kiba dang sahteng ha Mawlai kum ka surok bad kiwei.
U la ong ba hadien ba u la rem kum u MLA ha u snem 2023, da ki phew klur ki skhim ha Mawlai ki la sahkut noh.
“Ha ka jingshisha haba long Nongmihkhmat ka dei ban don ka jingbuddien ban bteng ïa ki kam. Hadien ba la shongthait noh i Bah SD Khongwir (ba la khlad noh) nga la shimti nga la buddien ma nga, ha bym long MLA ma nga i Bah Found (ba la khlad noh) i la buddien, ha bym long shuh Bah Found buddien i Bah Embhah, haba ym long shuh Bah Embhah la buddien sa Bah Teibor. Nga pangnud pangmet bad la sngewduh jingmyntoi ki nongshong shnong jong ka Mawlai”, la ong u Bah Process Sawkmie.
